Шӯрои шаҳри Бишкек талош дорад Эмомалӣ Раҳмон, раисҷумҳури Тоҷикистонро аз унвони “Шаҳрванди фахрии пойтахти Қирғизистон” маҳрум кунад.
Тавре раиси Шӯрои шаҳри Бишкек Куваничбек Конгантиев ба расонаҳои қирғизӣ хабар додааст, вакилон талош доранд ин инвонро аз Эмомалӣ Раҳмон бекор кунанд, вале тибқи қонунҳои мавҷуда ҳоло ин корро карда наметавонанд. “Вакилон метавонанд шаҳрвандро мукофотпулӣ таъйин кунанд, аммо ӯро аз ин унвон маҳрум карда наметавонанд.”, мегӯяд Конгантиев.
Вале раиси Шӯрои шаҳри Бишкек мегӯяд, ин масъаларо дар ҷаласаи баъдӣ бо вакилон баррасӣ хоҳанд кард.
Ёдовар мешавем, ки соли 1999 дар замони президент будани Аскар Акаев раиси онвақтаи шаҳри Бишкек Феликс Қулов ба раисҷумҳури Тоҷикистон нишони сарисинагии “Шаҳрванди фахрии пойтахти Қирғизистон”-ро тақдим карда буд.
Ин қарори Шӯрои шаҳри Бишкек дар ҳоле гирифта мешавад, ки ахиран дар рӯзҳои 14-17-уми сентябр задухӯрдҳои мусаллаҳона рух дод, ки дар натиҷа беш аз сад нафар аз тараф кушта ва даҳҳо каси дигар захмӣ шуданд.
Дар пайи ин даргириҳо агарчи рӯзи 25-уми сентябр байни Кумитаи давлатии амнияти миллии ду кишвар созишномаҳои дуҷониба ба даст омад, вале рӯзи 28-уми сентябр вакили парлумони Қирғизистон Султонбой Айҷигитов иддао кард, ки ҳама созишномаҳо бо Тоҷикистон бекор карда шаванд. Ба гуфтаи ӯ, ин созишномаҳои дутарафа зери фишору таҳдидҳои низомӣ сурат гирифтаанд ва ҳукми қонунӣ надоранд.
