Гурӯҳе аз мухолифони тоҷик дар шаҳри Вена, пойтахти Утриш рӯзи 14 октябр гирдиҳамоии эътирозӣ ташкил карданд.
Ҳадаф аз ин ҳамоиши эътирозӣ изҳори норозигӣ аз сафари Эмомалӣ Раҳмон, раисҷумҳури Тоҷикистон ба Аврупо ва истиқболи вай аз ҷониби раҳбарияти Иттиҳоди Аврупо ва кишварҳои Белгиву Фаронса гуфта мешавад.
Дар ин ҳамиоиш Маҳмудҷон Файзраҳмонов, раҳбари департаменти равобити хориҷии Паймони миллии Тоҷикистон ва Фатҳиддин Усмонзода, намояндаи ПМТ дар Утриш ва дигарон иштирок ва суханронӣ карданд.
Маҳмудҷон мегӯяд, мо бо ин эътирози худ сафари Эмомалӣ Раҳмон ба Аврупоро ба хотири сиёсатҳои зиддидемократӣ ва саркубгариҳояш нисбат ба озодандешон ва фаъолони сиёсӣ, маҳкум мекунем.
Ташкилкунандагони ин пикет дар охир номаи эътирозии худро ба дасти намояндаи Иттиҳоди Аврупо дар Утриш супориданд.
Гуфта мешавад, пеш аз ин намояндаҳои мухолифин дар ин се рӯз ахир дар кишварҳои Литва, Лаҳистон, Ҳоланд ва Фаронса низ ҳамоишҳои эътирозии худро баргузор карда буданд.
