Муҳоҷират

Эътирози сокинони Литва алайҳи муҳоҷирон (Видео)

Даҳҳо нафар аз сокинони Литва, ки муқобили сохтани урдугоҳ (лагер)-и муҳоҷирони ғайриқонунӣ бо нишони эътироз гирди ҳам омада буданд, полис ҷамъи онҳоро пароканда кард.

Ин ҳодиса дирӯз 27-июл дар полигони ҳарбии Руднинкайи ин кишвар ба вуқуъ пайваст. Дар ин минтақа, ки сохтмони лагер ба нақша гирифта шудааст, ҳудуди 500 нафар сокинони маҳаллӣ зиндагӣ мекунанд. Дар ин бора шабакаи Telegram-и RT хабар медиҳад.

Ба иттилои манбаъ, дар ибтидо сокинон барои гирдиҳамоӣ ба сӯи сохтмони урдугоҳ рафтанд, вале баъдтар ба бастани роҳ шурӯъ карда, тайи чанд соат нагузоштанд, ки таҷҳизоти сохтмонӣ аз роҳ бигзарад.

Бино ба навиштаи расонаҳои ин кишвар, баъд аз омадани пулис ва нерӯҳои махсус мавҷи эътирозҳо коҳиш ёфт ва сипас полис мардумро пароканда кард. Мақомот 8 нафар аз эътирозгарони маҳаллиро боздошт карданд.  

Пештар вазири корҳои дохилии Литва Агне Билотайте изҳор дошта буд, ки мехоҳанд дар полигони Руднинкай барои 1,5 ҳазор нафар муҳоҷир урдугоҳе бунёд кунанд. Ба гуфтаи вазир, бар асоси шароити мавҷудбуда маҳз дар ҳамин полигони ҳарбӣ ҷой кардани муҳоҷирон ва хайма сохтан осон аст. Вай интихоби ҷойро барои назорати доимӣ аз болои гурезагон ва афзоиши гардиши онҳо дар марз бо Беларус шарҳ дод.

Дар аввали моҳи июл Литва бинобар зиёд омадани муҳоҷирони ғайриқонунӣ дар кишвар режими фавқулодда ҷорӣ кард. Вилнюс Минскро дар бӯҳрони муҳоҷират айбдор мекунад. Аммо Мақомоти Беларус мегӯянд, ки онҳо барои ҳифзи сарҳадот пурра мубориза мебаранд.

Илҳомҷон Ёқубов, раиси Анҷумани муҳоҷирони Осиёи Марказӣ дар Литва ба Аздо тв гуфт, дар як моҳи охир беш аз ду ҳазор муҳоҷир бо роҳи ғайриқонунӣ аз Беларусия ба хоки Литва ворид шудаанд, ки дар байни онҳо 10 нафар аз шаҳрвандони Тоҷикистон низ ҳаст.

Илҳомҷон Ёқубов. Сурат: Фейсбук
"Онҳое, ки ба кишвари Литва омадаанд, ҳамчун паноҳҷӯ сабти ном хоҳанд шуд. Аксари муҳоҷирон аз кишварҳои диктотуриву авторитарӣ ҳастанд ва бештарашон аз Шарқи наздик ва Африқо. Ва беш аз даҳ нафар бо роҳи қочоқӣ шаҳрвандони Тоҷикистон ҳам вориди кишвари Литва шудаанд."

Ёқубов дар идомаи сӯҳбаташ мегӯяд, ҳар рӯз тақрибан 100 нафар муҳоҷир бемамоният аз марзи Беларусия вориди хоки Литва шуда ва мардуми бумӣ низ аз зиёд шудани онҳо хеле нигаронанд.

"Дар минтақаҳое, ки муҳоҷирон ҷой дода мешаванд, тазоҳурот ва эътирозҳои мардумӣ баргузор шуда истодааст. Ғайр аз ин худи муҳоҷирон ҳам шарики ин эътирозҳо ҳастанд ва шарти муҳоҷирон ин аст, ки ё дар ин кишвар соҳиби мақоми паноҳандагӣ бо шароити беҳтар шаванд ва ё онҳоро ба ҳоли худ гузоранд то ба дигар кишварҳои ИА бираванд", - гуфт Ёқубов.

Ин ҳам дар ҳолест, ки 26-уми июл Хадамоти давлатии марзбонии Литва қайд кард, ки дар ин моҳ марзбонон 100 маротиба бештар нисбат ба моҳи январ паноҳҷӯёнро, ки тавассути марзи Беларус қочоқӣ ворид шудаанд, боздошт карданд.


Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp, Viber ва Imo ба ин рақам:

Матолиби дигари Муҳоҷират

Муҳоҷират

Боздошти пуштибони муҳоҷирон дар фурудгоҳи Шереметово

Афғонистон

Паноҳҷӯёни афғон: 25 рӯз боз дар марз мунтазири вуруд ба Тоҷикистонем

Муҳоҷират

Видео: ФСБ боздошти гумонбаронро нишон дод

Муҳоҷират

Боздошти чор тоҷикистонӣ бо иттиҳоми пайравӣ аз Толибон