Тоҷикистон ва Чин тасмим гирифтаанд, ки тибқи барномаҳои тавсеаи ҳамкориҳои худ филмҳои муштарак ба навор бигиранд.
Бино ба иттилои расмӣ, 21-уми июни соли 2023 Муҳаммадсаид Шоҳиён, директори Муассисаи давлатии Тоҷикфилм ҳангоми мулоқот бо Ли Мингуян, муассиси Ҷамъияти Дорои Масъулияти Маҳдуд (ҶДММ) “Сарез” дар бораи ба наворгирии филмҳои муштараки Тоҷикистон ва Чин ба тавофуқ расидаанд.
Ба қавли масъулони Тоҷикфилм, дар рафти ин мулоқот дар бораи тавсеаи робитаю ҳамкориҳои студияҳои филмсозӣ, филмбардории муштарак ва баргузории чорабиниҳои фарҳангию синамоӣ таъкид шуд. Ва низ ишора шуда, ки ин гуна ҳамкориҳо ба рушди минбаъдаи соҳаи фарҳангу синамо заминаи мусоид фароҳам оварда, дар оянда барои ҳар ду ҷониб манфиатовар хоҳад буд.
Гуфта мешавад, ҷонибҳо таъкид кардаанд, ки ба наворгирии филмҳои муштарак ва “баргузории чорабиниҳои фарҳангию синамоӣ бо иштироки ходимони санъату фарҳанги ҳар ду ҷониб” барои ошоноии беҳтари ҳарду миллатҳо ва “робитаҳои дӯстию ҳамҷаворӣ” мусоидат хоҳад кард.
Ба гуфтаи бархе таҳлилгарон, Чин бо сармоягузории аз ҳад зиёд ба хеле аз кишварҳои дорои иқтисоди заъиф тавониста, ки беш аз 50% бозорҳои онҳоро аз худ карда, акнун ба баҳонаи “ба наворгирии филмҳои муштарак” қасд дорад ҳам ба бозори кино ва филмҳои ин кишарҳо, аз ҷумла Тоҷикистон нуфуз пайдо кунад ва ҳам сиёсат ва фарҳанги худро таблиғ намояд.
