Дар деҳаи Дарёободи ноҳияи Рӯдакӣ ҷасади як занро ҳамроҳи се фарзандашро пайдо карданд.
Ҳодисаи қатли модару ду духтар ва як писар шоми ҷумъаи 5-уми сентябр рух додааст, вале ҳамсояҳо ҷасади онҳоро баъди ду рӯз пайдо кардаанд.
Аз кушташудаҳо модари оила Шаҳло, ду духтараш бо номҳои Ҳабиба ва Ҳамида, ки дар синфҳои 9 ва 10 таҳсил мекарданд ва писараш Шараф, ки хонандаи синфи 6 будааст, ном мебаранд.
Радиои Озодӣ дар истинод ба яке аз ҳамсояҳои онҳо менависад, ки шавҳари Шаҳло дар муҳоҷирати корӣ дар Русия будааст ва баъди кор накардани телефонҳои аҳли оила ба ҳамсояҳо занг зада, хоҳиш мекунад ба хонаи онҳо раванд.
Ва вақте зани ҳамсоя бо як ҳамсояи дигар вориди хонаи онҳо мешаванд, мебинанд ҳама ҷо кофтагӣ, бӯйи ғализ мебарояду дар як ҷойгаҳ Шараф даҳонаш бо “скотч” печонидагӣ мурдааст ва доду фарёд карда, мебароянд. Пас аз ин пулис омада, дар хона ҷасадҳоро пайдо мекунанд.
Мақомоти расмӣ то кунун тафсилоти ҳодисаро шарҳ надодаанд ва маълум нест, ки нафаре дар робита ба ин ҳодиса боздошт шудааст ё не.
Аммо сокинони деҳа мегӯянд, ин ҳодиса мардумро сахт нигарон ва тарсондааст ва ҳатто дар мактабҳо миёни хонандагону омӯзгорон танҳо дар бораи ҳамин фоҷиа суҳбат меравад.
