Кумитаи манзил ва коммуналии назди Ҳукумати Ҷумҳурии Тоҷикистон мегӯяд, дар 56 бахши ин ниҳод низоми пардохтҳои ғайринақдиро ҷорӣ кардааст.
Суҳроб Саидов, сардори шуъбаи ҳисоббаробаркунӣ ва хидматрасонии муштариёни Кумита иттилоъ додааст, ки пардохтҳо барои хидматрасонии оби нӯшокӣ ва партовҳо дар шаҳру ноҳияҳои вилояти Суғд, Хатлон, ВМКБ ва навоҳии тобеи ҷумҳурӣ акнун танҳо тариқи бонкҳо ва тавассути барномаи сахсус бо телефони мобили анҷом мешаванд.
Барои ин, базаи ягонаи серверӣ ва системаи муосири биллингӣ таҳия шуда, ҳамаи муштариён ба низоми нав пайваст карда шудаанд.
Ба гуфтаи ӯ, ҳар муштарӣ соҳиби рақами инфиродии суратҳисоб мебошад, ки тавассути он метавонад хидматрасониро интихоб ва маблағро онлайн пардохт намояд. Ин тадбир ба афзоиши шаффофият, бехатарӣ ва самаранокии низоми коммуналӣ мусоидат хоҳад кард.
Мақомот мегӯянд, пардохтҳои ғайринақдӣ тадриҷан дар соҳаҳои гуногуни давлатӣ, аз ҷумла, маориф, энергетика ва андоз роҳандозӣ мешавад. Ҳадафи ин иқдом пешрафти иқтисоди рақамӣ ва коҳиши коррупсия гуфта мешавад.
Аммо бояд гуфт, ки қариб дар тамоми сохторҳои ҳукуматӣ коррупсия вуҷуд дорад ва ҳатто як ниҳоди зиддикоррупсионӣ дар кишвар фаъол аст. Аммо бо вуҷуди ин, сатҳи коррупсия ва фасод дар кишвар дар сатҳи хеле баланд боқӣ мондааст.
Мунтақидон бар ин боваранд, ки гузариш ба пардохтҳои ғайринақдӣ метавонад то андозае сатҳи ришваву фасодро коҳиш диҳад, аммо ин роҳи ҳалли ниҳоии мубориза бо коррупсия нест. Ба андешаи онҳо, Ҳукумат бояд иқтисоди кишварро рушд диҳад, шароити хуби кор ва маоши муносибро таъмин кунад.
