23.9 C
Dushanbe

Идомаи боздошти муҳоҷирон дар Русия

Дар пайи як амалиёти мақомоти интизомии Русия чанд тан аз муҳоҷирони корӣ дар шаҳраки Котелникии вилояти Маскав боздошт шуданд.

Шабакаи телеграммии “Многонационал” бо нашри чанд аксу навор аз идомаи “рейд”-у боздошти муҳоҷирон дар шаҳраки Котленики хабар дод.

Ба иттилои манбаъ, нерӯҳои амниятӣ дар асоси шикояти сокинони руси ин шаҳрак нуқтаҳои кору хоби муҳоҷиронро тафтиш карданд.

Дар наворҳои нашркардаи ин шабака дида мешавад, ки кормандони ОМОН қаҳвахонаи “Бек-бургер” ва хобгоҳи “Белая дача”-и шаҳраки Котелникро тафтиш доранд. Қисме аз муҳоҷирон дастҳо пушти сар дар замин хобидаанд, қисми дигарро ба мошин савор карда ба шуъбаи пулис бурданианд.

То ҳол маълум нест, ки миёни боздоштшудаҳо шаҳрвандони Тоҷикистон ҳастанд ё не.

Шабакаи телеграммии “Многонационал” менависад, ки дар натиҷаи ин “рейд” даҳҳо муҳоҷири хориҷӣ, ки ғайриқонунӣ дар Русия қарор доштанд, муайян карда шудааст ва чунин рейдҳо мунтазам идома хоҳанд ёфт.

Чанд моҳи ахир аст, ки дар шаҳру ноҳияҳои Федератсияи Русия аз ҷониби мақомоти ин кишвар тафтишу бозҷӯӣ ё “рейд”-и густурдаи муҳоҷирон идома дорад. Ва яке аз аввалин рейди густарда дар соли ҷорӣ дар шаҳраки Котелникии вилояти Маскав пас аз шикояти сокинони маҳаллии он ба Президенти Русия оғоз гардид.

То ин муддат наворҳои зиёде нашр шуда, ки дар онҳо дида мешавад, мақомоти интизомии ин кишвар муҳоҷиронро гурӯҳ-гурӯҳ боздошт намуда, ба боздоштгоҳҳо мебаранд.

Ба гуфтаи муҳоҷирон, мақомоти рус ҳам шаб ва ҳам рӯз ҷойи кор ва макони истиқомати онҳоро тафтиш намуда, чӣ аснод дошта бошанд чи на, ҳамаро якҷоя боздошт мекунанд. Вале, ба гуфтаи муҳоҷирон, касе ҳуҷҷатҳои лозимаро дошта бошад, озод мекунанд, аммо онҳое, ки ҳуҷҷат надоранд боздошту ихроҷ мешаванд ва ҳатто табқи хабарҳои тасдиқнашуда, муҳоҷирони боздоштшударо ба ҷанги Украина ҷалб кардаанд.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Мақомот мехоҳанд бародари як мухолифи тоҷикро аз хонааш берун кунанд

Мақомоти ноҳияи Зафаробод мехоҳанд замини як мухолифи тоҷик Салим Султонзодаро, ки дар он бародараш хона сохтаасту зиндагӣ мекунад, мусодира кунад.

Мақомот: Занҳо сарт напӯшанду мардҳо ришу мӯйи баланд нагузоранд!

Мақомоти амниятӣ ва интизомии кишвар дар кӯчаву бозорҳо "рейд" гузаронида, масъалаи пешгирӣ аз "либоси ба фарҳанги тоҷикон бегона"-ро сахт гирифтаанд.

Кишварҳои аврупоӣ давлати Фаластинро ба расмият шинохтанд

Рӯзи чоршанбе, 22-уми майи соли ҷорӣ кишварҳои Ирландия, Испания ва Норвегия аз тасмими худ дар бораи ба расмият шинохтани давлати Фаластин хабар доданд.

Сафари Раҳмон ба Теҳрон

Субҳи имрӯз Президенти Тоҷикистон дар раъси як ҳайати расмӣ вориди Теҳрон, пойтахти Эрон шуд.