Ҳафтаи дуюм аст, ки дар шаҳру ноҳияҳои Федератсияи Русия аз ҷониби мақомоти ин кишвар тафтишу бозҷӯӣ ё “рейд”-и густурдаи муҳоҷирон идома дорад.
Дар шабакаҳои иҷтимоӣ наворҳое нашр шудаанд, ки дар онҳо дида мешавад, мақомоти интизомии ин кишвар муҳоҷиронро гурӯҳ-гурӯҳ боздошт намуда, ба боздоштгоҳҳо мебаранд.
Навори тозае рӯзи 29-уми май дар саҳфаи инстаграмии Parviz.tv нашр шуд, ки дида мешавад, дар як майдони варзишие дар шаҳри Маскав гурӯҳе аз муҳоҷирон ба шикам хобида, дастонашон пушти сар аст ва чанд низомие дар наздашон рост истодааст. Дар навори дигаре дида мешавад, ки муҳоҷирон қатор дастҳо болои китфҳои якдигаранд ва нерӯҳои интизомии рус онҳоро ба куҷое бурда истодаанд.
Дар зери ин навор навишта шудааст, ки “Имрӯз, 29.05.2023 даҳҳо муҳоҷирро дар шаҳри Москва ҳангоми бозии футбол дар яке аз майдончаҳои футбол дастгир кардаанд. Гӯё ки муҳоҷирони корӣ кӯдаконро аз майдончаи футбол пеш карда, худ футбол бозӣ карда бошанд“.
Инчунин ҳафтаи пеш дар яке аз масҷидҳои Русия, мақомоти интизомии ин кишвар дарҳоро аз берун баста ҳуҷҷати муҳоҷиронро тафтиш кардаанд. Ба гуфтаи муҳоҷирон касе ҳуҷҷатҳои лозимаро дорад озод мекунанд, аммо онҳое ки ҳуҷҷат надоранд ба идораи пулис бурда ихроҷашон мекунанд.
Гуфта мешавад, ин “рейд”-ҳо бо иштироки ОМОН, кормандони воҳидҳои оперативӣ, Хадамоти амнияти федеролӣ (маъруф ба ФСБ) ва нерӯҳои марзбонии Русия баргузор шуда истодааст.
Ба гуфтаи муҳоҷирон, мақомоти рус ҳам шаб ва ҳам рӯз ҷойи кор ва макони истиқомати онҳоро тафтиш намуда, гурӯҳ-гурӯҳ муҳоҷиронро бо худ ба шуъбаҳои пулис ва дигар ниҳодҳои қудратӣ мебаранд.
Як муҳоҷири тоҷик, ки нахост номаш зикр шавад дар суҳбат бо Azda.tv гуфт, ки кормандони интизомии Русия аз баъзе муҳоҷироне, ки мушкили ҳуҷҷат доранд, маблағ гирифта онҳоро озод мекунанд.
Бино ба иттилои манбаъ, бар иловаи гирифтани ришва ҳолати латтукӯби муҳоҷирон дар рафти ин “рейд”-ҳо низ вуҷуд дорад.
То ҳол мақомоти Русия сабаби яку якбора даст задан ба тафтиши густурдаи муҳоҷиронро шарҳ надодаанд.
