Президентҳои Тоҷикистону Эрон Эмомалӣ Раҳмон ва Масъуд Пизишкиён чандин санади ҳамкориро ба имзо расондаанд.
Раисҷумҳури Эрон 15-уми январ бо сафари давлатӣ вориди Душанбе шуда буд ва 17-уми январ аз Тоҷикистон ба Русия хоҳад рафт.
Пизишкиён дар доираи сафараш ба Тоҷикистон аз Донишгоҳи тиббии кишвар дидан карда, унвони “Профессори фахрӣ”-и ин донишгоҳро соҳиб гаштааст.
Гуфта мешавад, раисҷумҳурони ду кишвар зимни мулоқотҳо дар робита ба авзои Афғонистону Навори Ғазза ва дигар масоили ҳамкориҳои дуҷониба гуфтугӯ карда, 23 санадро дар соҳаҳои иқтисод, фарҳанг, маориф, муҳоҷират ва ғайраро ба имзо расонданд.
Эмомалӣ Раҳмон зимни мулоқоти аввал бо Пизишкиён, ки навори он дар шабакаҳои иҷтимоӣ нашр шудааст, ба бардошта шудани раводид миёни Тоҷикистону Эрон ишора намуда, ба ӯ мегӯяд, ки бори дигар дар ҷашни “Наврӯз” ба Тоҷикистон биёяд.
“Наврӯзи мо ҷашни хонаводагӣ нест, ҷашни умумилӣ аст. Ҳама хурсандӣ мекунанд. 12 рӯз не, 1 моҳ тамоми гӯшаву канори мамлакат хурсандӣ мекунанд” – мегӯяд раисҷумҳури худкомаи Тоҷикистон.
Ҳамзамон Раҳмонов ва Пизишкиён дар форуми соҳибкорону тоҷирони Тоҷикистону Эрон низ ширкат мекунанд. Ба иттилои расонаҳо, миёни соҳибкорони ду кишвар 13 санади ҳамкорӣ ба маблағи беш аз 450 миллион доллар ба имзо расидааст.
Дар ин нишаст низ Раҳмонов ба бардошта шудани раводид миёни ду кишвар ишора намуда, аз соҳибкорони эронӣ даъват мекунад, ки агар дар Тоҷикистон сармоягузорӣ ҳам накунанд, инҷо хонаашон ҳаст ва ҳарвақте хостанд ҳамроҳи фарзандонашон биёянд.
Гуфта мешавад, ин бори аввал аст, ки Масъуд Пизишкиён пас аз пирӯз шудан дар интихоботи президентии Эрон ба Тоҷикистон меояд. Ӯ қаблан дар моҳи сентябри соли 2024 дар ҳошияи нишастаҳои Маҷмаи умумии Созмони Милал дар Амрико бо раисҷумҳури Тоҷикистон мулоқот карда буд.
Ин сафар дар ҳолес сурат мегирад, ки дар ин шабу рӯзҳо чанде аз блогерони тоҷик ва мубаллиғони ҳукумати Раҳмон дар шаҳрҳои гуногуни Эрон қарор дошта, гардишгарони тоҷикро барои сафар ба Эрон ташвиқ доранд.
Гуфта мешавад, дар пасманзари сафари Пизишкиён ба Душанбе миёни ширкатҳои сайёҳии Тоҷикистон ва Эрон 6 санади ҳамкорӣ низ ба имзо расидааст.
Мақомоти Тоҷикистону Эрон дар ин чанд соли ахир робитаи печидае дошта, тира шудани муносибатҳои дипломатии ду кишвар аз зиндонӣ шудани Бобаки Занҷонӣ шуруъ шуд ва бо бастани Ҳизби наҳзати исломии Тоҷикистон дар соли 2015 ин муносибатҳо тиратар гашта буд.
Мунособати ин ду кишвар дар соли 2019 каме беҳтар шуда, бо раисҷумҳур шудани Иброҳим Раисӣ миёни Тоҷикистону Эрон низоми рафту омади бидуни раводид барои шаҳрвандони ду кишвар ҷорӣ шуд.
Беҳтар шудани муносибатҳои дипломатӣ ба додугирифти тиҷоратӣ байни Тоҷикистон ва Эрон таъсир расонда, он дар соли 2024 то 336 миллион доллар расид. Ин дар ҳолест, ки дар соли 2021 додугирифт миёни ду кишвар ба 120 миллион доллар баробар буд.
