Ширкатҳои “Вавилон” ва “МегаФон Тоҷикистон” ҳаққи хидматрасониҳои мобилӣ ва интернетии худро барои муштариёнаш дар Тоҷикистон беш аз 10% гаронтар мекунанд.
Бино ба иттилои корбарони тоҷик дар шабакаҳои иҷтимоӣ, 22-юми январи соли 2024 бархе ширкатҳои мобилӣ дар Тоҷикистон ба муштариёни худ тариқи паёмакҳо (SMS) хабар додаанд, ки шуруъ аз 1-уми феврали соли ҷорӣ нархи хидматрасониҳои мобилӣ, аз ҷумла басатаҳои интернетӣ ва дақиқаҳои суҳбат кардан гаронтар мешаванд.
Дар ин бора бархе корбарон, ки дар шабакаҳои иҷтимоӣ фаъол ҳастанд, хабар доданд, субҳи имрӯз аз ширкати МегаФон-Тоҷикистон тариқи SMS чунин паёмҳое дарёфт кардаанд.
Рӯзноманигор Ёқуб Ҳалимов гуфтааст, “Хадамоти алоқа ваъдаи интернети арзону босифатро медиҳад, ширкатҳои мобилӣ ҳушдори гаронии онро (ва бе огоҳиву ҳушдор сифати хидматрасониро бадтар мекунанд). Ҳоло тарофаи бо арзиши 49 сомонӣ ба 55 сомонӣ мерасад ва барои гуфтугӯи телефонӣ пардохти иловагӣ роҳандозӣ мешавад.” Корбаре бо номи Шӯҳрат Тилалов, муштарии МегаФон-Тоҷикистон мегӯяд, “пардохти тарофаи ман моҳона 109,25с буд, ҳоло бошад смс паёмак омадаст, ки тарофаи Шумо 122с шудааст, яъне 11 сомони дигар зам шуд.”
Инчунин дар ин паёмакҳо таъкид шудааст, ки “ба арзиши зангҳои содиротӣ ба шабакаҳои мобилӣ, шаҳрӣ ва собити Ҷумҳурии Тоҷикистон тағйирот ворид мегардад, баъди ба поён расидани ҳаҷми дақиқаҳои тарофа нархи 1 дақиқа баробар ба 25 дирам” нархгузорӣ карда мешавад.
Гуфта мешавад, ширкатҳои мобилии Тоҷикистон дар ҳоле нархи хидматрасониҳои худро беш аз 10% қимат кардан мехоҳанд, ки тайи чанд соли ахир сатҳи пасти хидматрасонии молибӣ ва интернетии онҳо натанҳо мардуми деҳот, балки шаҳру ноҳияҳоро ҳам нигарон кардааст.
