Интиқоди муовини аввали раиси вилояти Суғд аз гузоришоти бардурӯғу изофанависиҳо

Муовини аввали раиси вилояти Суғд, Хол Ҳайдар дар ҷаласаи ҷамъбастӣ аз масъулини ҳукумати шаҳри Панҷакент интиқод намуда гуфтааст, ки маълумоти бардурӯғ ва изофанависиро дар гузоришҳояшон ҷой додаанд.

Ҳамчунин аз ҷамъоварии сусти чанд намуди андоз, аз ҷумла андоз аз молу мулки ғайриманқул, андоз аз хоҷагиҳои кишоварзӣ, таъсиси корхонаҳои саноатӣ дар Панҷакент, дер пардохт намудани нафақаву маоши кормандони буҷавӣ ва масъалаи қабули шаҳрвандон интиқод намудааст.

Бино ба иттилои сомонаи “Азияи-Плюс” Хол Ҳайдар ба масъулини шаҳри Панҷакент гуфтааст, ки “дар коргоҳи “Маърифатпарвар” ҳам аз рӯи нақшаи ваъданамудаатон қариб 100 нафар бояд коргар қабул мекардед. Аммо накардед. Чаро ҷойҳои кории дурӯғин таъсис медиҳед? Киро фиреб мекунед? Фақат барои худнамоӣ бошад, даркор нест! Дар соҳаи саноат 45 нафар коргарони маошгир кам шудаанд”.

Вале дар ҷавоб Муҳаммадсодир Сафарзода, муовини аввали раиси шаҳри Панҷакент иҷро нашудани ваъдаи ҷойҳои кориро ба "КМ Зарафшон” нисбат додааст, ки ҳар сол коргаронро ба нафақа ҷавоб медиҳад, вале ба ҷояшон коргар қабул намекунад.

Ҳамчунин муовини аввали раиси вилояти Суғд дар бахши кишоварзӣ аз кам захира кардани хошок, кишти нокифояи баъзе аз сабзавот, аз ҷумла сабзиву пиёз, изофанависӣ дар кишти картошка низ изҳори нигаронӣ намудааст, ки   1385 кг изофанависӣ дар кишти картошка аз тарафи мақомоти додситонӣ   ошкор гардидааст.

Ҳамчунин дар шарҳи ин корманди собиқи  “КМ Зарафшон” Исмоил Зарифӣ навиштааст, ки пас аз ҷанд соле ин корхонаро хитоиҳо забт мекунанд, дигар тоҷиконро ба онҷо ба кор намегиранд.