Сафири Тоҷикистон дар Эрон фош кард, ки дар вақти таҳия Ёддошти тафоҳум байни Тоҷикистон ва Эрон дар бораи лағв кардани раводид ҷонибҳо ба муҳтавои он дуруст аҳамият надода буданд.
Бино ба иттилои расонаҳои эронӣ, Низомиддин Зоҳидӣ, сафири Тоҷикистон дар Эрон гуфтааст: “замоне ки он тасвибнома омода шуд, ба ҷои ин ки бинависанд лағви виза миёни Тоҷикистон ва Эрон барқарор мешавад, навишта шудааст миёни Душанбе ва Теҳрон лағви раводид барқарор аст.”
Ба гуфтаи сафири Тоҷикистон дар Эрон, ба хотири ҳамин як иштибоҳ аст, ки дар ҳоли ҳозир ҳама мусофироне, ки аз Душанбе ба Теҳрон ва ё аз Теҳрон ба Душанбе сафар мекунанд, виза лозим надоранд, аммо дигар ҳама мусофироне, ки барои мисол аз Машҳад ба Хуҷанд ва аз Кӯлоб ба Киш ва ё баръакс ба кишварҳои ҳамдигар сафар мекунанд, бояд виза дошта бошанд.
Ҳамзамон Низомиддин Зоҳид аз гарон будани нархи сафар гила карда, гуфтааст, ки яке аз далелҳои дигаре, ки бо гузашти 20 рӯз аз лағви раводид ҳамоно теъдоди мусофирон байни ду кишвар камтар аст, гарон будани нархи билети ҳавопаймоҳо мебошад.
Ҷониби Тоҷикистон қасд дорад ба хотири осонтар кардани рафту омади сайёҳон дигар хатсайраҳои нави мусофирбарӣ байни бузургшаҳрҳои Тоҷикистон ва Эронро ба роҳ бимонад. Ин хатсайрҳои ҷадид пас аз ислоҳи тавофуқномаи лағви виза байни Тоҷикистон ва Эрон байни Шерозу Душанбе ва байни Кишу Душанбе ба роҳ монда мешавад.
