Чоршанбеи ҳафтаи ҷорӣ Додситони кулли Тоҷикистон назди вакилони парлумони кишвар ҳисобот медиҳад.
Бино ба иттилои расмӣ, 28-уми феврали соли 2024 “иҷлосияи ҳабдаҳуми Маҷлиси миллии Маҷлиси Олии Ҷумҳурии Тоҷикистон, даъвати шашум” дар шаҳри Душанбе баргузор мегардад.
Ба қавли манбаъ, дар ин иҷлосия, ки “соати 10:00 дар маҷлисгоҳи Маҷлиси миллии Маҷлиси Олии Ҷумҳурии Тоҷикистон баргузор мегардад”, ҳисоботи Юсуф Раҳмон, Додситони кулли Тоҷикистон “Дар бораи назорати риояи дақиқ ва иҷрои якхелаи қонунҳо дар ҳудуди Ҷумҳурии Тоҷикистон дар соли 2023” шунида мешавад.
Дар ҳамин рӯз пеш аз баргузории ин иҷлосия, соати 09:00 ҷаласаи Шурои Маҷлиси миллии Маҷлиси Олии Ҷумҳурии Тоҷикистон низ гузаронида мешавад. Ва гуфта мешавад, дар ин иҷлосия инчунин пешниҳодҳои Президенти Ҷумҳурии Тоҷикистон дар бораи додани ризоият барои таъйин ва озод намудани муовини якум ва муовинони Додситони кулли кишвар ҳам мавриди баррасӣ қарор мегирад.
Юсуф Раҳмон аз 23-уми январи соли 2015 то ҳол ба муддати 10 сол дар курсии Додситони кулли Тоҷикистон такия задааст. Ба гуфтаи мухолифони ҳукумат, вай пеш аз он ки қудои Эмомалӣ Раҳмон шавад, дар солҳои 2015-2017 садҳо нафар аз мухолифони сиёсатҳои Президенти Тоҷикистонро бо баҳонаҳои мухталиф боздошт, шиканҷа ва ба зиндон фиристодааст. Ин раванд ҳамоно ҳам идома дорад.
