Бино ба иттилои расонаҳо, рӯзи 2-уми январи соли 2024 Солеҳ Арурӣ, яке аз раҳбарони баландпояи ҲАМОС дар шаҳри Бейрути Лубнон мавриди ҳуҷум қарор гирифта, ҷон бохт.
Морк Рагу, сухангуи ҳукумати Исроил дар пасманзари террори Арурӣ ба расонаҳо гуфт, ки ин амалиёт ҳамла ба Лубнон ва ё Ҳизбуллоҳ талаққӣ намешавад. Аммо, мақомоти Исроил ин амалиётро яке аз даставовардҳои бузурги мақомоти амниятии худ арзёбӣ карда, аз ин кор изҳори хушнудӣ карданд.
Гуфта мешавад, Исроил дафтари ҲАМОС-ро, ки дар ҷануби Берут буд, бо паҳпод ҳамла кард. Дар натиҷаи ин ҳамлаи паҳподӣ раҳбари ҲАМОС Солеҳ Арурӣ ва ду фармондеҳи Қассом – шохаи низомии ҲАМОС низ кушта шудаанд. Бархе расонаҳо гуфтаанд, ки ҳамроҳи Арурӣ 4 нафар аз фармондеҳони Қассом кушта шудаанд.
ҲАМОМ ин ҳамларо маҳкум кард ва ҳамзамон Ҳизбуллоҳ бо маҳкум кардани ин ҳамла онро ҳуҷум ба замини Лубнон дониста, таъкид карда, ки ин ҳамларо бепосух намегузорад.
Ба гуфтаи таҳлилгарон, ин ҳамла дар маконе сурат гирифта, ки дар онҷо нуфузи Ҳизбуллоҳ бештар асту дафтарҳои корӣ ва хонаҳои мақомҳои баландпояи ин ҳизб дар он минтақа ҷойгир аст.
Ҳамлаи паҳподии Исроил ва куштани мақоми калидии ҲАМОС дар Лубнон дар ҳоле анҷом шуд, ки ҷанг дар Ғазза се моҳ боз ҷараён дорад. Ба гуфтаи таҳлилгарон, чун Исроил дар давоми се моҳи ҷанг дар Ғазза ба аҳдофи эълон кардааш даст наёфт, маҷбур шуд ба террори мақомҳои ҲАМОС, ки дар хориҷ аз Ғазза ҳастанд, даст бизанад, то ҳадди ақал бигӯяд, ки коре карда тавонистааст.
