Дар вилояти Суғд давоми 9 моҳи соли ҷорӣ истеҳсоли равғани растанӣ нисбат ба соли гузашта наздики 112 дарсад бештар шудааст, вале ҳоло нархи он дар бозорҳо аз солҳои пешин ба маротиб гаронттар аст.
Дар ҷаласаи ҷамъбасти рушди иқтисоди вилояти Суғд, ки рӯзи 11-уми октябр гузаронида шуд, гузориш доданд, ки “истеҳсоли маҳсулоти хӯроквории ивазкунандаи воридот сол аз сол тавсеа ёфта, дар 9 моҳи соли 2022 ба миқдори 3135,2 тонна равғани растанӣ истеҳсол шудааст, ки баробари 111,8 фоизи нишондиҳандаи ҳамин давраи соли қаблӣ мебошад.”
Ҳамзамаон дар ҷаласаи вилоятӣ, ки раиси он Раҷаббой Аҳмадзода низ ширкат доштааст, гуфта шуда, ки истеҳсоли нон ва маҳсулотӣ нонӣ низ бештар гардида “ба миқдори 32401,1 тонна… бо суръати афзоиш 110,8 фоиз таъмин гардидааст”.
Дар ин ҷаласа инчунин истеҳсоли дигар маҳсулот низ нисбат ба соли гузашта аз 100 дарсад бештар гузориш шуд.
Дар ҳоле мақомоти вилояти Суғд аз истеҳсол ва афзоиши беш аз 100 дарсадии равғану маҳсулоти нонӣ хабар медиҳанд, ки нархи ин маҳсулот дар бозорҳои кишвар, ба хусус дар бозорҳои шаҳри Хуҷанд имсол ба маротиб афзоиш ёфтааст.