Рӯзи сешанбе Иттиҳоди Аврупо барои бардоштани таҳримҳои иқтисодие, ки алайҳи кишвари Сурия гузошта шуда буд, мувофиқат кард.
Кая Каллас, масъули сиёсати хориҷии Иттиҳоди Аврупо рӯзи 20-уми май ба расонаҳо гуфт, вазирони корҳои хориҷии Иттиҳоди Аврупо имрӯз дар Бруксел ҷамъ омада, барои лағви таҳримҳои иқтисодӣ алайҳи Сурия ба мувофиқа расиданд. Ӯ афзуд: “Мо мехоҳем барои мардуми Сурия ҷойҳои корӣ ва василаҳои рӯзгорро фароҳам орем, то ин кишвар босубот гардад ва дубора ба по хезад.“
Ин мақомдори ИА гуфт, ки вазирон қарореро баррасӣ карданд, ки аз нигоҳи сиёсӣ таҳримҳои иқтисодиро лағв мекунад, вале он таҳримҳое, ки ба режими президенти сарнагуншудаи Сурия Башор Асад марбут аст, бекор намешаванд ва инчунин чораҳои шадиде алйҳи поймолкунандагони ҳуқуқи инсон роҳандозӣ мекуаннд.
Ҳафтаи гузашта, Иттиҳоди Аврупо эълон карда буд, ки роҳҳои сабуктар кардани таҳримҳо алайҳи Сурияро баррасӣ дорад, то ба ин восита дар барқарорсозии ин кишвари ҷангзада кумак кунад.
Дар охири феврали соли ҷорӣ, Иттиҳоди Аврупо қадамҳои аввали худро барои бекор кардани баъзе маҳдудиятҳои иқтисодӣ алайҳи Сурия оғоз кард. Аз ҷумла, бардошти таҳримҳо дар бахшҳои энержӣ, нақлиёт ва хадамоти бонкиро аз иқдомҳои аввали ИА буд.
Мақомҳои 27 кишвари узви Иттиҳоди Аврупо тавсия доданд, ки дар бахшҳои, мисли энержӣ ва нақлиёт маҳдудиятҳо зуд бардошта шаванд, то ба сохти давлати нав мусоидат ва ранҷу азобҳои мардуми Сурия камтар гардад.
Ин ҳам дар ҳолест, ки президенти Амрико Доналд Трамп ҳафтаи гузашта дар Риёз эълон кард, ки таҳримҳо алайҳи Сурияро бармедорад. Вазорати корҳои хориҷии Сурия аз ин иқдоми Трамп истиқбол кард ва онро “қадами умедбахш дар самти хотима додан ба ранҷу азоби мардуми Сурия” номид.
