Иттиҳоди Аврупо барои коҳиши вобастагии Осиёи Марказӣ ба энержии Русия тасмим гирифтааст дар баландтарин нерӯгоҳи барқии обии ҷаҳон дар Тоҷикистон сармоягузорӣ кунад.
Ба гузориши хабаргузориии “Reuters” Иттиҳоди Аврупо тасмим гирифтааст дар баландтарин нерӯгоҳи обии ҷаҳон (Нерӯгоҳи обии Роғун) ба калонтарин сармоягузори ин нерӯгоҳ табдил шавад.
Қарор аст Бонки сармоягузории Аврупо, бозуи иқтисодӣ ва моллии Иттиҳоди Аврупо барои коҳиши вобастагии Осиёи Марказӣ ба энержии Русия ва дар вокуниш ба тарҳи роҳи Абрешими Чин дар НБО-и Роғун сармоягузорӣ кунад.
Далер Ҷумъа, вазири энержии Тоҷикистон дар суҳбат ба хабаргузории “Ройтерз” гуфтааст, тарҳи НБО-и Роғун ҳудудан 8 милярд доллар ҳазина дорад ва Ҳукумати Тоҷикистон аз соли 2016 то имрӯз ҳудудан 3 милярд доллар дар ин пуружаи бузурги энержӣ сармоягузорӣ кардааст. Ҳукумати Тоҷикистон барои такмили нерӯгоҳи Роғун аз Иттиҳоди Аврупо дархости кумаки молӣ ва фаннӣ кардааст ва ин иттиҳодия низ омодааст дар Роғун сармоягузорӣ кунад.
Сухангӯи Бонки сармоягузории Аврупо гуфтааст, ки ин бонк дар ҳамкорӣ бо Комиссия Аврупо, ки милярдҳо дуллори Иттиҳоди Аврупоро мудирият мекунад, алоқаманд ба сармоягузорӣ дар пуружаи нерӯгоҳи барқи обии Роғун ҳастанд ва дар ин пуружа саҳми калон хоҳанд гузошт, аммо ҷузиёт ва миқдори сармоягузориро фош накардааст.
Ҳукумати Тоҷикистон аз шарҳи ин мавзуъ худдорӣ кардааст ва эҳтимол меравад, ки Иттиҳоди Аврупо дар семоҳаи поёнии сол тасмими ниҳоияшро дар ин бора эълон кунад.
56 соли пеш сохтмони НБО-и Роғун дар соли 1976 дар замони Иттиҳоди Ҷамоҳири Шӯравӣ оғоз ёфта буд ва бо фурӯпошии шӯравӣ ва оғози ҷанги дохилӣ сарбанди ин нерӯгоҳро сел шуста бурд ва соли 2016 Ҳукумати Тоҷикистон шуруъ ба сармоягузорӣ дар ин тарҳ кард ва то имрӯз ду нерӯгоҳи Роғун роҳандозӣ шуда барқ тавлид доранд. Баландии ин нерӯгоҳ қарор аст ба 335 метр бирасад ва ба хотири ҳамин ҳам унвони баландтарин нерӯгоҳи барқи обии ҷаҳонро ба худ ихтисос додааст.
НБО-и Роғун аз ҷониби ширкати итолёвӣ Webuild (WBD.MI) сохта мешавад ва ширкатҳои вобаста ба хонаводаи Эмомалӣ Раҳмон аз шарикони асосии ин ширкати итолёвӣ дар сохти ин пуружа маҳсуб мешаванд.
Оғози сохтмони Нерӯгоҳи барқи обии Роғун 56 соли пеш бо сармояи Иттиҳоди Шӯравӣ шуруъ шуд ва дар замони истиқлолият Ҳукумати Тоҷикистон бо фурӯши авроқи қиматок ва саҳмияҳо дар дохил ва хориҷи кишвар ва инчунин бо ҷудо кардани маблағҳо калон аз будҷаи давлатӣ дар ин тарҳ беш аз 3 милярд долар сармоягузорӣ кард ва ҳоло бошад навбат ба сармояи Аврупоиҳо расидааст.
