Тибқи иттилои ахири Агентии назорат дар соҳаи энергетика, дар камтар аз як сол ҳудуди 3 ҳазор шаҳрванд барои барқдуздӣ ҷарима шуда, инчунин 94 иллион сомонӣ изофанависии барқ ошкор шудааст.
Хабаргузории “Азия-Плюс” бо такя ба маълумоти Агентии назорат дар соҳаи энергетика гузориш дод, ки шахсоне, ки дар қонуншиканиҳои соҳаи барқ даст доштанд, беш аз 1 миллион сомонӣ ҷарима шудаанд.
Ин ниҳод мегӯяд, дар давоми моҳҳои январ-октябри соли ҷорӣ, “танҳо аз ҷониби Агентӣ зиёда аз 2 ҳазор ҳолати қоидавайронкунӣ дар истифодаи нерӯи барқ ошкор гардид, ки зарари расида 134 миллион киловатт-соат ба маблағи беш аз 158 миллион сомониро ташкил медиҳад. Дар пайи ин 3 ҳазор парвандаи маъмурӣ ифтитоҳ шуда, дар умум ба маблағи 1 миллион сомонӣ ҷарима татбиқ шудааст”.
Бар асоси ин гузориш, Агентӣ иқрор шуда, ки дар муддати 10 моҳи соли ҷорӣ бар иловаи фош шудани барқдуздии аҳолӣ, изофанависӣ аз ҷониби кормандони соҳаи барқ низ ошкор шудааст.
Мақомоти соҳаи энергетикаи Тоҷикистон ҳамеша иддао мекунанд, ки аҳолии кишвар аз барқ қарздоранд ва пули барқро пардохт намекунанд. Дар ҳоле, ки Агентии назорат дар соҳаи энергетика ошкор мегӯяд, танҳо давоми 10 моҳи гузашта аз ҷониби масъулини Шабакаҳои тақсимоти барқ 282 миллион киловатт-соат барқ ба маблағи 94 миллион сомонӣ изофанависӣ сурат гирифтааст. Ва аксари ин изофанавсиҳои нерӯи барқ дар шаҳру ноҳияҳои тобеи марказ анҷом шудааст.
Моқомти Тоҷикистон чанде пеш ҷазо барои қонуншиканиҳо дар соҳаи барқ, аз ҷумла дуздии онро сахттар карданд. Ҳоло барои напардохтани маблағи барқи истифодашуда ва ё дуздии он аз 27 ҳазор то 90 ҳазор сомонӣ ҷарима ва ё аз 3 то 10 соли зиндон пешбинӣ шудааст.
Тибқи гуфтаи худи масъулони соҳа, дар давоми камтар аз як сол 3 ҳазор парвандаи маъмурӣ барои сокинон, ки ба қонуншиканӣ дар соҳаи барқ муттаҳам мешаванд, боз шудааст, аммо то ҳол мақомот ошкор нагуфтаанд, ки барои он маъмурони барқ, ки ба изофанавсӣ машғуланд ва ё корхонаҳои бузурге, ки марбути шахсони маъруфанд ва пули барқро намедиҳанд, парвандае боз шудааст ё на.
Ин ҳам дар ҳолест, ки дар ин шабу рӯзҳо аҳолии кишвар аз бебарқии шадид, ки ҳатто дар як шабонарӯз ба 2 ё 3 соат мерасад, ранҷ мекашанд. Сокинон мегӯянд, бо вуҷуди такрор ба такрор гуфтани Эмомалӣ, ки “бебарқӣ афсона мешавад”, то рафт сол ба сол барқро камтар медиҳанд. Соли ҷорӣ, ҳатто дар тобистон ҳам дар баъзе навоҳӣ барқ чанд муддате қатъ шуда буд.
