Ба гузориши шабакаи “Ал-Ҷазира”, Исроил асри рӯзи ҷумъа, 5-уми август ҳамлаи низомии худро ба Навори Ғазза оғоз кард, ки дар натиҷа 11 нафар бо шумлули кӯдакон кушта ва беш аз 80 нафар захмӣ шуд.
Мақомоти Исроил хабар дод, ки дар ҳамла ба Ғазза яке аз раҳбарони Ҳаракати муқовимати исломӣ (Ҳамос), Тайсир Ал-Ҷаъбариро куштанд. Ҳамос ҳам кушта шудани ӯро тасдиқ кард.
Артиши Исроил хабар дод, ки бар зидди Навори Ғазза амалиёти низомиашро бо номи “Субҳи содиқ” оғоз карда, чандин нуқтаҳои будубоши раҳбарони ҳаракати “Ҳамос”-ро ҳадаф қарор дод.
Аммо хабарнигорони шабакаи “Ал-Ҷазира” аз макони ҳодиса иттилоъ доданд, ки артиши Исроил чандин хона ва нуқтаҳои аҳолинишинро ҳадаф қарор додааст ва кушташудаҳо ҳам аз мардуми оддиянд.
Дар ҳамин ҳол Муҳаммад Абусалима, мудири беморхонаи марказии Навори Ғазза ба расонаҳо гуфт, ки сафи захмиҳо лаҳза ба лаҳза бештар мешавад, “вале мо ҷиддан аз нарасидани лавозимоти тиббӣ ранҷ мекашем. Тарси онро дорем, ки барқ низ қатъ хоҳад шуд, он вақт мушкилотамон дучанд мешавад”.
Хабар такмил меёбад
