Хоҳари бобои Дона аз аҳволи бародараш гуфт (Видео)

Дар шабакаҳои иҷтимоӣ наворе нашр шуд, ки гуфта мешавад аз хонаи бобои Дона (Набиев Донаёр) гирифта шудааст. Дар навор хоҳари бобои Дона зоҳир мешавад ва аз мушкилоти ин бобо дар зиндон ҳикоят мекунад.

Фаъолон дар шабакаҳои иҷтимоӣ тайи чанд рӯзи ахир мақомоти Тоҷикистонро барои зиндонӣ кардани як пирамарди солхӯрда сахт танқид мекунанд. Фаъолон мегӯянд мақомот пирамарди аз 80-сола боло Набиев Донаёрро бегуноҳ зиндонӣ кардааст.

Аммо Вазорати умури дохилӣ бо нашри баёнияи расмие дар шаби 8 уми январ гуфт, Набиев Донаёрро бегуноҳ зиндонӣ накардааст.

Дар баёния омада, ки узви собиқи ҲНИТ бо иттиҳоми ифротгароӣ ва кумаки молӣ ба ҷангҷӯёни тоҷик дар хориҷ ба 7 соли зиндон маҳкум шудааст. Вазорати корҳои дохилӣ даъво карда ки Набиев, сокини деҳаи Гулбуттаи ноҳияи Рӯдакӣ пули хадамоти махсуси баъзе аз кишварҳоро гирифта ва онҳоро “барои паҳн кардани ғояҳои ифротӣ, харидорӣ, нашр ва густариши адабиёти экстремистӣ, ҷалб ва сафарбар намудани ҷавонон ба сафи гурӯҳҳои ҷиҳодӣ сарф мекард”.

Дар ҳоле Вазорат аз ҳеҷ кишвари мушаххас ном намебарад ва далелу санадеро ҳам пешниҳод накардааст.

Маҳмадӣ Тешаев собиқ раиси ҲНИТ дар н.Рӯдакӣ дар як паёми видеоии худ пештар гуфта, буд ки Донаёр Набиевро ба хотири кумак ба зиндониёни сиёсӣ ҳабс кардаанд. Чун парванда махфист, маълум нест расман ӯ бар асоси кадом моддаи Қонуни ҷиноӣ муттаҳам ва зиндонӣ шудааст.

Ба гуфтаи Тешаев бобои Донаро моҳи сентябри соли 2020 кормандони КДАМ дар манзили зисташ воқеъ дар деҳаи Гулбутта, ҷамоати Чимтеппаи ноҳияи Рӯдакӣ боздошт кардаанд ва то замони эълони ҳукмаш, дар СИЗО-и шаҳри Душанбе зери фишорҳои шадиди рӯҳӣ нигаҳдорӣ мешуд ва охири моҳи декабр ба 5 соли зиндон маҳкум гардид. Аммо дертар мақомот гуфтанд ӯро ба 7 соли зиндон маҳкум кардаанд.

Баъди нашри байния аз тарафи ВКД, Ҳизби наҳзати исломӣ Тоҷкистон дар як изҳороте, ки рӯзи 9-уми январ нашр кард, гуфт:

“Ирсоли маблағҳо аз тарафи хонавода, наздикон ва аъзои ҲНИТ ба хонаводаи зиндониёни сиёсӣ аслан ҷиноят нест ва бобои Дона агар кумаке кардааст, аз хешовандону наздикон ва аъзои ҲНИТ дар хориҷ дарёфт кардааст ва ҳеҷ рабте ба хадамоти махсуси ягон кишвар надорад.”

Маҳмади Тешаев мегӯяд, ки Набиев Донаёр то манъи фаъолияти ҲНИТ дар Тоҷикистон масъули комиссияи тафтишотиии ин ҳизб дар ноҳияи Рӯдакӣ буд. Баъди манъи фаъолияти ҲНИТ аз ҷониби Ҳукумати Тоҷикистон дар дохили кишвар дар соли 2015, ин пирамард ҳеч фаъолияте дар ҲНИТ надошт ва дунболи зиндагӣ ва корҳои шахсии худ буд.Ин ягона парванда дар паи гирифтани куамк ё додани он ба хонаводаҳои зиндониён нест.

Пештар масъулони паноҳбурдаи ҲНИТ дар Аврупо гуфтанд, ки Юусупов Зайниддин як узви собиқи ҲНИТ-ро ба он гунаҳгор донистаанд, ки ӯ аз Асрориддин Розиқов, писари зиндонии сиёсӣ, Зубайдуллоҳи Розиқ 200 доллар кумак гирифтааст ва ӯро барои як сол ба зиндон равона карданд.

Ҳамчунин Додгоҳи ноҳияи Исмоили Сомонии шаҳри Душанбе худи Асрориддин Розиқов, писари Зубайдуллоҳи Розиқ, бо ду нафари дигар Муҳаммадии Соҳибнзар ва Баҳриддини Қурбон ба 5 сол ва 6 солӣ зиндон маҳкум кард. Онҳо дар расонидани кумак ба хонаводаҳои маҳбусон гунаҳкор дониста мешавнд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.