Рӯзи 14-уми сентябр Додгоҳи вилоятии Боткенти Қирғизистон ду шаҳрванди Тоҷикистонро бо иттиҳоми даст доштан дар муноқишаҳои марзии моҳи апрели имсол Додгоҳ паси дарҳои баста бе иштироки наздикони маҳкумшудаҳо анҷом ёфтааст. Пайвандони маҳкумшудагон аз ҳукми додгоҳ розӣ нестанд. Ин ду шаҳрванд пас аз даргириҳои хунини моҳи апрел ба сурати номаълум аз ҷониби Қирғистон дастгир шуданд. Бино ба иттилои Радиои Озодӣ ин ду шаҳрванди Тоҷикистон Абдурозиқ Абдуқаҳҳоров ва Аскар Юнусов ном дошта бо ду моддаи Кодекси ҷиноятии ин кишвар – (моддаи 380 “ҷиноят ба зидди сулҳ” ва моддаи 391 “ғоратгарӣ”) гунаҳкор дониста шудаанд. Аммо худи мақомоти Тоҷикистон то ҳол дар бораи якумра маҳкум ба зиндон шудани шаҳрвандони худ дар кишвари ҳамсоя вокунише накардааст. Наздикони ин ду маҳкумшуда ба Радиои Озодӣ гуфтаанд, ки муҳокима рӯзи 14 сентябр анҷом ёфт, вале онҳоро барои ҳузур дар мурофиа роҳ надоданд, танҳо вакили мудофеашон, Мэлс Абдураимов дар мурофиа ҳаққи ҳузур пайдо кардааст. Абдулазиз Юнусов, падари Аскар Юнусов гуфта, ки додгоҳ ба ҷуз як навор, ки писараш ҳамроҳи афроди мусаллаҳ дида мешавад, дигар далеле надорад. Ва аз ҳукми додгоҳ нисбати писараш изҳори норозигӣ кард. Эълони ҳукми абад нисбати шаҳрвандони Тоҷикистон дар ҳолест, ки имрӯзҳо дар Тоҷикистон нишасти Созмони ҳамкориҳои Шанхай СҲШ ва Созмони паймони амнияти дастаҷамъӣ (СПАД) баргузор мегардад. Таҳлилгарон бар ин назаранд, ки чун дар маслаъаи Афғонистон ва ҳимоят аз тоҷикони он сӯи Омӯ дар ин шабу рӯз Тоҷикистон дар минтақа танҳо мондааст, ҷониби Қирғизистон ин масъаларо яке аз заъфҳои кишварамон дониста, содир кардани ҳукми абадро алайҳи шаҳрванди Тоҷикистон ҳамчун фишанг истифода кардааст. Ёдовар мешавем, ки дар даргириҳои марзии моҳи апрел байни Тоҷикистон ва Қирғизистон даҳҳо шаҳрванд аз ду ҷониб кушта ва захмӣ шуданд. Тоҷикистон куштаншудагони ин даргириро 19 ва захмиёнро 87 нафар эълон кард. Ҷониби Қирғизистон аз 36 кушта ва 189 захмӣ хабар дода буд. Мақомоти ду кишвар ҳамдигарро барои оғози ҷанг гунаҳкор меҳисобанд. Дар пасманзари ин даргирии хунин фаъолони ҷомеаи мадании Қирғизистон як гурӯҳеро аз ҳуқуқшиносон ва фаъолони ҷомеа таъсис доданд, ки вазифааш ҳисоби хасороти воридшуда бар Қирғизистон ва ҷамъоварии далоил алайҳи Тоҷикистон мебошад. Ва бо ин кор онҳо талош доранд Тоҷикистонро гунаҳкори асосии ин даргирии хунин барои ҷомеаи ҷаҳонӣ нишон бидиҳанд. Тоҷикистону Қирғизистон бо ҳам 980 километр марзи муштарка доранд. То ҳол 519 километри он мушаххас ва аломатгузорӣ шуда, боқӣ номуайян мондааст. Гурӯҳҳои кории ҳукуматҳо барои делимитатся ва демакратсияи марз талош доранд, вале бо гузашти моҳҳо ба натиҷаи дилхоҳ нарасидаанд.
Тӯҳфаи Қирғизистон ба Тоҷикистон: Ҳукми абади ду тоҷик
