Сокинони деҳаи Оқсойи вилояти Бодканди Қирғизистон, мошини боркаши шаҳрванди Тоҷикистон Насрулобек Асламовро, ки ба деҳаи Ворухи шаҳри Исфара маводи ғизоӣ мебурд, сангборон кардаанд.
Бино ба иттилои дафтари матбуоти ҳукумати шаҳри Исфара, ҳодиса рӯзи 20-уми январ дар деҳаи Оқсойи Қирғизистон рух додааст. Дар натиҷаи ин ҳодиса ронандаи тоҷик осеб дида, тиреза ва чароғҳои мошини боркаш шикастааст.
Қарор аст имрӯз, 21-уми январ намояндагони шаҳрҳои Исфара ва Бодканд бо ҳам мулоқот ва ин ҳодисаро баррасӣ кунанд.
Роҳи миёни Чоркӯҳ ва Ворух аз миёни маҳаллаи Оқсойи Қирғизистон мегузарад ва ин макон то ин вақт борҳо шоҳиди муноқишаҳои марзӣ шудааст.
Ёдовар мешавем, ки дар моҳи апрели соли 2021 дар натиҷаи даргирии мусаллаҳона дар марзи Тоҷикистону Қирғизистон аз ҳарду ҷониб 55 нафар кушта, ҳудуди 300 нафар захмӣ шуданд.
Тоҷикистон ва Қирғизистон бо ҳам 976 километр марзи муштрак доранд, ки то ҳол танҳо 504 километраш мушаххас ва аломатгузорӣ шудааст.
