Тоҷикистон аз Ӯзбекистон ба маблағи 17 миллион доллар гази табиӣ харидорӣ карда ва ба 7,2 миллион доллар нерӯи барқ содир кардааст.
Оҷонси хабарии “Avesta.Tj” менависад, ки дар қиёс бо содироти барқ воридоти газ бештар анҷом гирифтааст. Тибқи иттиллои маркази матбуоти Вазорати энергетика ва захираҳои оби Ҷумҳурии Тоҷикистон ҳаҷми воридоти гази табиӣ аз ин кишвари ҳамсоя 2,3 баробар аз маблағи содироти нерӯи барқ зиёд мебошад.
Манбаъи ин вазорат гуфтааст дар шаш моҳи соли ҷорӣ ба Ӯзбекистон дар ҳаҷми 358 млн. кВт. соат нерӯи барқ ба баҳои 7,2 миллион доллари ИМА содир шудааст. Аммо дар ҳамин давраи сол воридоти гази табиӣ аз Узбекистон дар ҳаҷми 144 млн. мукааб метр ва ба маблағи 17 миллион доллар сурат гирифтааст.
Мақомоти энергетикии Тоҷикистон маълумот дар бораи ҳаҷми содироти нерӯи барқ ба Ӯзбекистон дар соли 2020 -ро изҳор намедоранд. Аммо қаблан эълон шуда буд, ки соли ҷорӣ аз ин кишвар дар ҳаҷми 200 млн. кубометр гази табиӣ ворид карда мешавад.
Масъалаи содироти ношаффофи нерӯи барқи Тоҷикистон ба Ӯзбекистон на як бору ду бор мавриди интиқоди расонаҳо ва коршиносон қарор гирифтааст. Гуфта мешавад маблағҳои зиёде аз ин ҳисоб мустақим ба суратҳисобҳои оффшории Эмомалӣ Раҳмон, раиси ҷумҳурӣ ва бастагони ӯ ворез мешаванд. Ин нуктаро Муҳиддин Кабирӣ, раиси ПМТ низ дар чанде аз сӯҳбатҳои интернетии худ баён дошта буд.
