Ҳизби демократи Тоҷикистон аз баргузор шудани Анҷумани ҳизбаш аз тарафи “гурӯҳи номаълум” ҳушдор додааст.
Раҷаби Мирзо, рӯзноманигори маъруфи тоҷик дар саҳифаи фейсбукияш изҳороти Шӯрои сиёсии ҲДТ-ро нашр кардааст. Дар изҳорот гуфта мешавад: “Гурӯҳи номаълум мехоҳанд Анҷумани ғайринавбатии ҳизбро баргузор кунанд.”
Зимни нашри ин изҳорот Шӯрои сиёсии ҲДТ аз аъзоёни худ хоста, ки ба Анҷумани ғайринавбатии ҳизб, ки ба гуфтаи он, як “гурӯҳи номаълум” онро барпо карданиянд, ширкат накунанд.
“Ба маълумоти ҳамаи аъзоён ва тарафдорони ҲДТ расонида мешавад ки 11 майи соли 2024 гуруҳи номаълум бо сардории Шаҳбози Аброр ва Юлдошев Абдуҷаббор мехоҳанд Анҷумани ғайринавбатии ҲДТ ро баргузор кунанд. Ин рафтори ғайриоинномави буда ба Шурои Сиёсӣи ҲДТ алоқаманд нест. Аз ин ру аз иштирок дар чунин чорабиниҳои ғайриқонунию ғайриоинномави худдори намоед! Ин рафтори ғайриоинномавии ин нафарон рузи 8 май соли 2024 дар Шурои сиёсии ғайринавбатии ҲДТ мавриди муҳокима қарор гирифта қарори Шурои сиёсии ҲДТ қабул карда шуд.“, омадааст дар изҳороти ин ҳизб.
Дар вокуниш ба ин изҳорот Абдуҷаббор Юлдошев, раиси ҲДТ дар вилояти Суғд навишта, ки “Аз се ду ҳиссаи аъзоёни Шӯрои сиёсӣ ба ҷонибдори даъвати Анҷумани ғайринавбати овоз доданд.” Ба гуфтаи ӯ, “Аъзоёни Шӯрои Сиёсӣ тибқи оинномаи ҲДТ амал карданд.” Юлдошев дар хитоб ба навиштаи Раҷаби Мирзо мегӯяд: “Аз пашша фил сохтан лозим набуд.”
Ин баҳси дохилиҳизбии аъзои аршади ҲДТ дар мавриди баргузории Анҷуман дар ҳоле сурат мегирад, ки моҳи июни соли 2021 Ҳизби сотсиал-демократи Тоҷикистон, ки то он дам раҳбарияшро Раҳматилло Зоиров бар дӯш дошт, низ Анҷуман барпо кард ва масъулияти раҳбарии ҳизбро ба муовинаш Қиёмиддин Азизов дод. Аммо бархе аз аъзоёни ҳизб, аз ҷумла муовинони собиқи Зоиров раҳбарии Азизовро қабул накарданд. Ва бо ҳамин дигар фаъолияти ин ҳизб дар саҳнаи сиёсати кишвар камранг шуд. Ба гуфтаи корбарон, эҳтимол ҳангоми оғози маъракаҳои интихоботӣ боз пайдо шавад.
Аксар фаъолон ва корбарон ҲДТ-ро ҳам ба қатори “ҳизбҳои кисагӣ” ворид мекунанд ва онро ҳизби наздик ба ҳизби ҳоким медонанд, ки дар масоили муҳим мавқеи мухолиф надорад. Аммо раҳбарияти он ин иддаоро рад мекунад.
Бархе таҳлилгарон бар ин назаранд, ки ҳукумати Эмомалӣ Раҳмон таҳаммули пазириши ҳизбҳои сиёсии қавиро надорад ва пас аз байн бурдани ҲНИТ дар соли 2015 тавонист нақши ҲКТ ва баъдан ҲСДТ ва инак ҲДТ-ро дар ҷомеа камранг кунад.
