Бонки ҷаҳонӣ рӯзи 12-уми январ барои маблағгузорӣ дар сохтмони Нерӯгоҳи барқи обии “Роғун” дар ҳаҷми 15 миллион доллари амрикоӣ қарор қабул кард.
Гуфта мешавад, ин маблағгузорӣ ба шакли грант ба Тоҷикистон дода мешавад. Ва бо мақсади “дастгирии Ҳукумати Ҷумҳурии Тоҷикистон барои беҳбуд бахшидани заминаи молиявӣ ва тиҷоратии НОБ-и “Роғун” ва беҳтар намудани нишондиҳандаҳои устувории техникӣ, экологӣ ва иҷтимоии он мебошад.”
Бонки ҷаҳонӣ мегӯяд, лоиҳаи НОБ-и “Роғун”, ки ҳоло сохтмонаш ҷараён дорад, дар сурати татбиқи устувори молӣ, экологӣ ва иҷтимоӣ ба Тоҷикистон ва дигар кишварҳои Осиёи Марказӣ нафъи назарраси иқтисодӣ, иҷтимоӣ ва экологӣ меорад.
Гуфта мешавад, бо анҷоми ин нерӯгоҳи барқӣ Тоҷикистон пурра эҳтиёҷоти дохилии худро бо нерӯи барқ таъмин мекунад, бахусус дар фасли зимистон. Инчунин метавонад барқи тавлидшудаи изофиро ба кишварҳои ҳамсоя содир кунад.
Ин дар ҳолест, ки Ҳукумати Тоҷикистон ва ҳатто худи Эмомалӣ Раҳмон борҳо мардуми тоҷикро ваъда додаанд, ки “лимит” бардошта мешавад ва қатъи барқ дар фасли сармо ба “афсона” мубаддал мегардад. Аммо то ҳол, ки барқ ҳамеша бидуни қатъ ба кишварҳои ҳамсоя, аз ҷумла ба Афғонистон содир мешавад, вале аҳолии Тоҷикистон аз охири фасли тирамоҳ то аввали баҳор дар бебарқӣ ранҷ мекашанд.
Ҳамчунин гуфта мешавад, ки Бонки ҷаҳонӣ нақша дорад дар оянда низ дар лоиҳаи НБО-и “Роғун” маблағгузорӣ дар ҳаҷми бештарро дар назар бигирад.
Гуфтанист, Бонки ҷаҳонӣ дар Тоҷикистон феълан 22 лоиҳаро дар ҳаҷми умумии 1 миллиарду 470 миллион доллари амрикои маблағгузорӣ мекунад. Аммо аз соли 1996 то имрӯз ин бонк ба Тоҷикистон тавассути грантҳои Иттиҳодияи Байналмилалии Рушд ва қарзҳои хеле имтиёзнок ба маблағи умумии 2,65 миллиард доллар маблағгузорӣ кардааст.
