Бонки миллии Тоҷикистон расман қурби пули миллӣ-сомониро дар баробари рубли русӣ болор бурда, вале бонкҳои тиҷоратӣ онро нисбат ба як рӯзи пеш пойин бурданд.
Субҳи имрӯз, 25-уми феврали соли 2022 Бонки миллии Тоҷикистон расман қурби 1 рубли русиро 0,1330, яъне 1000 рубли русиро баробар ба 133 сомонӣ эълон кард.
Гуфта мешавад, дирӯз пас аз оғози ҳамлаҳои Русия ба Украина якбора пули рубли русӣ дар баробари тамоми арзҳои хориҷӣ, аз он ҷумла пули миллӣ-сомонӣ низ суқут карда, вале то поёни рӯз Бонки миллии Тоҷикистон қурбли рубли русиро дар баробари пули миллӣ-сомонӣ бетағйир боқӣ гузошта буд.
Бо ин вуҷуд, бархе бонкҳои тиҷоратии Тоҷикистон, аз он ҷумла Амонатбонқ ва Эсхата бо суқути рулби русӣ дар биржаҳои арзи хориҷӣ қурби сомониро дар баробари рубли русӣ боло бурда, 1000 рубли русиро баробар 128 сомонӣ эълон карда буданд.
Аммо имрӯз ҳам биржаи арзҳои хориҷӣ ва ҳам бонкҳои тиҷоратии Тоҷикистон қурби рубли русиро дар баробари пули миллӣ-сомонӣ нисбат ба як рӯзи пеш каме боло бурда, 1000 рулби русиро баробар ба 133 ва 134 сомонӣ эълон кардаанд.
