Шоми рӯзи панҷшанбе, 7-уми марти соли ҷорӣ ҳавопаймоҳои амрикоӣ маводи ғизоиро болои сокинон дар шимолу ғарбии Навори Ғазза аз осмон партоб карданд, ки дар натиҷа 5 нафар кушта шуданд.
Гуфта мешавад, дирӯз сандуқҳои маводи ғизоӣ дар макони серодам партоб шуданд, вале ҳангоми партоб чатри чанде аз сандуқҳои бузург боз нашуда, бо суръат болои сокинон афтоданд, ки боиси чунин фалокат шудааст.
Наворҳое, ки ин ҳодисаро сабт карда ва дар шабакаҳои иҷтимоӣ нашр шудаанд, дида мешавад, ки барзами кушода нашудани чатри чанде аз сандуқҳои бузург, боз ба шакли ҷудогона чисмҳои хурдҳаҷми зиёде болои сокинон меборад.
Дар натиҷаи партоби иштибоҳии маводи ғизоӣ болои мардум дар аввал аз кушта шудани ду ҷавон гузориш шуда буд, аммо субҳи имрӯз расонаҳо хабар доданд, ки шумори кушташудагон ба 5 нафар расида, чанд нафари дигар ҳам захмӣ шудааст.
Пас аз монеагузориҳои Исроил барои расондани кумакҳои инсонӣ тариқи заминӣ ба мардуми Ғазза, ин бори сеюм аст, ки дар як амалиёти муштараки Амрико ва Урдун бо се ҳавопаймои амрикоӣ болои сокинони мардуми Ғазза маводҳои ғизоӣ аз осмон партоб мешавад. Бори аввал низ қисмати зиёди ин кумакҳо ба дарё андохта шуданд, ки дастрасии мардум ба онҳо мушкил шуд.
Норасоии маводи ғизоӣ ба фоҷиаи инсонӣ дар Навори Ғазза табдил шудааст. То кунун, тибқи гузоришҳои расмӣ, беш аз 10 кӯдак аз сабаби норасоии ғизо ҷон додаанд. Пас аз ҳамлаҳои 5-моҳаи Исроил ба ин минтақаи серодам расондани ғизо ва даво ба Ғазза аз мавзуоти асосии гуфтумонҳои сиёсатмадорони ҷаҳон табдил шудааст. Бо вуҷуди исрорҳои зиёди Созмони Милали Муттаҳид, кишварҳои аврупоӣ ва исломӣ барои зарурати расондани кумакҳои башарӣ ба Ғазза, Исроил намегузорад куамкҳо тариқи заминӣ аз гузаргоҳи Рафаҳ аз ҷониби Миср вориди Ғазза шаванд.
Бино ба иттилои Вазорати беҳдошти Фаластин, шуруъ аз 8-уми октябри соли 2023 дар натиҷаи ҳамлаҳои Исроил ба Навори Ғазза шумори кушташудагон наздик ба 31 ҳазор нафар расидааст, ки беш аз 70% онҳоро кӯдакону занон ташкил медиҳанд. Ва шумори захмиён бошад марзи 72 ҳазорро гузаштааст.
