Конфронси Байналмилалии занони рӯзноманигори Осиёи Марказӣ дар шаҳри Душанбе лағв шуд.
Бино ба иттилои “Эътилофи бонувони рӯзноманигор”, ин конфронс таҳти унвони “Садои баробарӣ: озодӣ, занон, расона” бояд рӯзи 1-уми май дар меҳмонхонаҳои “Серена” баргузор мешуд. Аммо як рӯз пеш масъулони меҳмонхона бидуни шарҳ додани сабабе ташкилкунандагони конфросро, ки толлорро омода мекардаанд, рондаанд.
Пас аз он ин эътилоф ба меҳмонхонаи “Румӣ” рафта, барои баргузории конфрос бо масъулонаш ба мувофиқа расидаанд, аммо рӯзи 1-уми май, замоне ки чорабинӣ аллакай оғоз шудаву меҳмонҳо ҳама расида буданд ва бояд суханронии ифтитоҳи сафирони Иттиҳоди Аврупо, Олмон, Британияи Кабир ва Фаронса оғоз мешуд, кормандони меҳмонхона омада, ҳамаро аз толор берун кардаанд.
Онҳо ба ташкилкунандагон ин конфронс гуфтаанд, ки дастур шудааст, то чорабиниро лағв кунанд ва то ҳол маълум нест, ки ин дастур аз куҷо дода шудааст.
Мақомоти расмии Тоҷикистон низ хомушанд ва то ҳол сабаби лағви конфронсро шарҳ надоданд.
“Эътилофи бонувони рӯзноманигор” мегӯяд, ки лағви чорабинӣ дар остонаи Рӯзи байналмилалии озодии матбуот рух дода, ин ҳодиса барои 50 бонуи хабарнигор ва ширкатдори конфронс аз кишварҳои Осиёи Марказӣ, инчунин меҳмонҳои хориҷиву дипломатҳо, ки дар конфронс ҳузур доштанд, мояи ноумедии бузург шуд.
Ба гуфтаи ташкилкунандагон, мақсади асосии конфронс эҷоди фазои амн барои табодули касбӣ, муҳокимаи масоили занон дар матбуот ва ғайра буд, на чизи дигар.
Бояд гуфт, дар ҳоле ин конфронси байналмилалӣ дар Душанбе лағв мешавад, ки тибқи арзёбиҳои созмонҳои байналмилалӣ, Тоҷикистон яке аз кишварҳои маҳдудкунандаи озодии матбуот дар минтақа ба ҳисоб рафта, рӯзноманигорон бо зиндон, фишор, худсензура ва монеаҳои маъмурӣ рӯ ба рӯ ҳастанд.
