Хадамоти муҳоҷирати Литва талаб кардааст, ки дигар ба шаҳрвандони Тоҷикистон виза барои кор ва ё иқомати муваққат дар Литва дода нашавад.
Мудири Хадамоти муҳоҷирати Литва Эвелина Гудзинскайте дар суҳбат бо радиои давлатии LRT пешниҳод карда, ки Маркази хидматрасонии хориҷии Литва дар Тоҷикистонро, ки барои иҷозати корӣ ё истиқомати муваққатӣ дархост қабул мекунад, баста шавад.
Бар асоси иттилои ин ниҳоди давлатии Литва, то аввали моҳи июни соли ҷорӣ шумори шаҳрвандони Тоҷикистон, ки бо иҷозати корӣ ё истиқомати муваққатӣ дар ин кишвар ҳузур доранд, тақрибан 6 250 нафарро ташкил додааст.
Эвелина дар ин суҳбаташ афзуда, ки дар тӯли ду сол шумораи муҳоҷирони тоҷик тақрибан панҷ карат афзоиш ёфтааст. Ӯ ҳамчунин гуфта, ки шаҳрвандони Тоҷикистон пас аз поён ёфтани муҳлати визаҳояшон дар аксар ҳолат хоки Литваро тарк намекунанд.
“Агар ба омори муҳоҷират ғайриқонунӣ назар афканем, дида мешавад, ки шумори шаҳрвандони Тоҷикистон, ки сари вақт хориҷ намешаванд ва бояд бо фармони ихроҷ шаванд, дар муқоиса масалан, бо узбекҳо хеле зиёданд.” — афзудааст ӯ.
Бар гуфтаи Гудзинскайте, тоҷикон инчунин аксар вақт дар марзи Беларусу Литва ҷамъ омада, кӯшиш мекунанд ба таври ғайриқонунӣ ворид шаванд.
Ин дар ҳолест, ки вазъи муҳоҷирони тоҷикистонӣ дар Русия чандон хуб нест ва як соли ахир боздошту ихроҷи онҳо аз Русия афзоиш ёфтааст. Таҳлилгарон бар ин назаранд, ки сиёсатҳои зидди муҳоҷиратии Русия роҳи кишварҳои аврупоӣ ва дигар кишварҳои дунёро ба рӯи муҳоҷирони тоҷик боз кардааст.
