Маҷмаае, ки бо 37 миллион сомонӣ сохта шуд, ба харобазор табдил шудааст

Як корбари фейсбук бо номи Alimshah Mehrzadeh дар саҳифааш чанд аксеро аз гузаргоҳи зеризаминии Маҷмааи таърихӣ-фарҳангии "Истиқлол"-и шаҳри Хуҷанд нашр кардааст, ки дида мешавад, гузаргоҳи навбунёд хароб шуда дар ҳолати бисёр бад қарор дорад.

Бино ба навиштаи ин корбар, гузаргоҳои зеризаминии Маҷмааи "Истиқлол"-и шаҳри Хуҷанд дар Ҷашни 25-солагии истиқлолияти Тоҷикистон моҳи сентябри соли 2016 бо иштироки Эмомалӣ Раҳмон ба истифода дода шуд.

Тибқи маълумоти расмӣ маблағе, ки дар сохти ин маҷмаа масраф шудааст, 37 миллион сомониро дар бар мегирад. Аммо бо гузашти беш аз 4 сол ба харобазор монанд шудааст.

“Ин иншоот, ки бо номи “Тоҷ” байни шаҳрвадон маъмул аст, дар соҳили рости дарёи Сир бунёд шуда, ба макони истироҳату фароғати шаҳрвадон табдил ёфтааст. Ҳамзамон ин макон ба харитаи сайёҳоне ки ба Хуҷанд меоянд, ворид шудааст. Девораҳову роҳравҳои ин гузаргоҳ ҳама шикаставу валангоранд Бархе ҷойҳоро кадом масъуле "скотч" часпондаву баъзе қисматҳои харобшударо "фанера" дарбеҳ кардаанд. Аммо дар маҷмуъ гузаштан аз ин гузаргоҳи харобу валангор бисёр даҳшатнок аст”, менависад Алимшоҳ.

Сурат: Фейсбук

Ин гузаргоҳи зеризаминӣ ягона роҳи бехатар барои сокинони ин минтақа, хусусан донишҷӯён будааст, ки мутаассифона ҳеч масъуле дар вилоят ба нигоҳу бин ва тармими он таваҷҷуҳ намекунад. Дар зери ин матлаб корбарони зиёде фикру андешаҳои худро вобаста ба ин ҳолат баён доштаанд.

Аз ҷумла Мақсуд Юсупов ном як корбар менависад, ки “аз рӯзи якуми ба истифода додан маълум буд, ки сифати корҳои сохтмонӣ бо дараҷаи паст иҷро шудааст. Ман бо як фахри зиёд меҳмононро бурда будам. Аз сифати корҳои анҷомдодашуда дар назди меҳмонон бисёр ба як ҳолати ногувор афтодам. Ин он вақт буд, ки аз ба истифода додани он мумкин ягон 6 моҳ гузашта буд”.

Дар Тоҷикистон ҳангоми сохта ва ба истифода додани иншооте, ки бо буҷаи давлатӣ сохта мешаванд, одатан баъд аз рафтани Президент ва оғози фаъолият фарсудаву валангор мегарданд.

Коршиносон сабаби умри кӯтоҳ доштани чунин иншоотро дар бесифатии маҳсулоти истифодашуда медонанд, ки бо сабаби дуздии маблағи ҷудошуда ва ҳисоботи бардурӯғ аз ҷониби масъулон ба чунин ҳолат мерасанд.

Сурат: Фейсбук

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.