Бобохонзода Фирӯз, сардори шуъбаи Прокуратураи генералии Тоҷикистон гирифтор шудани зиндониёнро ба бемории коронавирус рад кард.
Ӯ дар нишасти матбуотии Прокуратураи генералии кишвар, ки дирӯз 13 июл баргузор шуд, гуфт, “дар муассисаҳои ислоҳии Тоҷикистон хушбахтона ҳолатҳои беммории COVID-19 умуман ба қайд гирифта нашудааст”.
Ин дар ҳолест, ки пайвандони зиндониён, ба хусус зиндониёни сиёсӣ аз гирифтор шудани наздиконашон ба бемории каронавирус дар дохили зиндонҳои Тоҷикистон борҳо шикоят карда буданд.
Соли гузашта Шуҳрати Раҳматулло, писари Раҳматуллоҳи Раҷаб узви зиндонии ҲНИТ, ки дар зиндони рақами 1 адои ҷазо мекунад дар сӯҳбат ба Радиои Озодӣ гуфта буд, ташхиси рентгени падарашро ба як табиби хориҷӣ нишон дод ва ин пизишк гуфтааст, “90 дарсад падари шумо гирифтори СOVID-19 аст”.
Мақомти Тоҷикистон бо вуҷуди даргузашти 11 маҳбус бо нишонаҳои коронавиурс гирифтор шудани маҳбусон ба бемориро инкор мекарданд ва ҳамаи онҳоро “илтиҳоби сахти шуш” гуфтанд. Аммо баъдтар агарчи расман тасдиқ накарданд, вале вуҷуди онро дар дохили зиндонҳо рад ҳам накарданд.
Чанде пеш “Аздо тв” аз гирифтор шудани 57 зиндонӣ бо нишонаҳои коронавирус дар зиндони рақами яки пойтахт хабар дода буд. Манобеи “Аздо тв” гуфтанд, мақомот ва зиндонбонҳо сари вақт ба ёрӣ ва муолиҷаи гирифторони коронавирус намешитобанд.
Як манбаъ за дохили кишвар, ки нахост номаш зикр шавад, дар тамос бо “Аздо тв” гуфта буд:
“Дар муассисаи ислоҳии ЯС 3/1 маъруф ба зиндони рақами яки Душанбе як хешамон зиндонӣ аст, хабар дод, ки дар ин зиндон 57 нафар бо нишонаҳои COVID-19 бемор шудаанд”.
Вуҷуди ин бемориро дасти кам се манбаи дигар, ки наздикону пайвандонашон дар ин муассисаи ислоҳӣ ба сар мебаранд ва бо онҳо тамос доранд дар суҳбат бо “Аздо тв” таъйид карданд.
