БОЗНАШР АЗ НИШАСТИ МАТБУОТИИ ДОДСИТНИИ КУЛ ДАР СОЛИ 2021
Юсуф Раҳмон, додситони кулли Тоҷикистон 13-уми июли соли ҷорӣ зимни нишасти матбуотии ниҳодаш бо хабарнигорон дониши нокофӣ ва рафтори бисёр номуносибе аз худ нишон дод.
Ӯ дар баробари ин ки аз суоли баъзе хабарнигорон хашмгин мешуду посухи номуносиб медод, маълумоти ғалату нодуруст ҳам баъзан иро мекард.
Додситони кулли кишвар аввал аз суоли хабарнигорои Радиои Озодӣ, ки дар робита ба истирдоди ақаллиятҳои қавми уйғур аз Тоҷикистон ба Чин пурсид, бо як рафтори номуносиб ва дағалона гуфт, ки “ман дар ин бора маълумот надорам.” ва аз посухи возеҳ фирор кард.
Юсуф Раҳмон ҳамчунин вобаста ба татбиқ нашудани Қонуни авф нисбати зиндониёни бо иттиҳоми узвият дар “Ихвон-ул-муслимин” ба хабарнигори “Азия – Плюс” гуфт, “хай қонун татбиқ нашудаст нашудаст” ҳатто дуруст сарфаҳм нарафт, ки дақиқан сухан дар бораи чӣ меравад ва дар зикри номи ин гурӯҳ ҳам мушкилӣ мекашид.
Суоли дигаре, ки низ маълумот надоштани Додситони куллро ошкор кард, посухи ӯ вобаста ба қочоқи пулҳои зиёд тариқи Тоҷикистон ба Имороти Муттаҳидаи Арабӣ буд, ки гуфт қисме аз он маблағҳо “дирами Арабистони Саудӣ буд”, дар ҳоле, ки “дирам” пули Имороти Муттаҳидаи Арабӣ аст ва “риёл” пули Арабистони Саудӣ. Додситон инҷо ё байни кишварҳои Арабистони Саудӣ ва Имороти Муттаҳидаи Арабӣ фарқ гузошта наметавонад ва ё байни пулҳои миллии ин ду кишвар. Ҳатто номи кишвари Имороти Муттаҳидаи Арабиро дуруст зикр карда натавонист.
Ин дар ҳолест, ки 18-уми марти соли 2021 Самариддин Ализода, ки он замон дар вазифаи муовини вазири тандурустии Тоҷикистон буд, зимни нишасти матбуотӣ ба хотири фарқ нагузоштан байни кишварҳои Куриёи Ҷанубӣ ва Куриёи Шимолӣ аз вазифа ронда шуд. Пас ин қарор “беомодагӣ иштирок кардан дар нишасти матбуотӣ ва муаррифии нодурусти масъале” бояд барои ҳама яксон бошад. Юсуф Раҳмон шахси наздики Эмомалӣ Раҳмон аст, хоҳем дид то куҷо ин қарор барои ӯ татбиқ мешавад.
Дар идомаи ҳамин суол вақте хабарнигори “Азия – Плюс” тавзиҳоти Додситониро хост ва гуфт, ки сардори гумрукии вилояти Хатлон гуфта буд, ки воридоти пулу тилло тариқи гумруки Панҷи Поён то Душанбе қонунӣ ворид шуда буд, аммо Юсуф Раҳмон ба хашм омада, гуфт: “Хай шумо рафта аз ҳамун пурсидан гиред.“
Ин тарзи посухгӯии Додситони кулли кишвар аксар корбаронро ҳайратзада кард ва суолҳоеро низ дар зеҳни мардум ба вуҷуд овард. Бархе мепурсанд, ки ё Додситон бо тимаш дар бораи қазияи қочоқи тиллову пулҳои зиёд маълумоти кофӣ надоранд, ки ин шармандагӣ чунин ниҳоде аст ва ё “зери коса нимкоса”-е ҳасту намехоҳанд ҷузъиёти ин қазияро ба мардум фош кунанд. Аниқтараш худи ӯ ва бо қудояш дар ғасб ва тасарруфи ин миқдор тиллову маблағҳои зиёд даст доранд.
