Шаби 19-уми август ар як садамаи марговар дар вилояти Ҳироти Афғонистон ҳадди ақал 79 нафар, аз ҷумла 19 кӯдак ҷони худро аз даст доданд.
Ҳодиса дар шоҳроҳи Ҳирот-Исломқалъа, дар ноҳияи Гузараи Афғонистон вақте рух дод, ки як автобуси мусофирбари ҳомили муҳоҷирони афғон, ки тоза аз Эрон ихроҷ шуда буданд, бо як мошини боркаш ва мотосикл бархӯрд. Пас аз бархӯрд автобус оташ гирифт ва аксари мусофирон дар ҷои ҳодиса ҳалок шуданд.
Мақомоти Толибон гуфтаанд, ин ҳодиса яке аз маргбортарин садамаҳои солҳои охир дар Афғонистон ба ҳисоб меравад.
Ба гуфтаи мақомоти маҳаллӣ, сабаби садама суръати зиёди автобус ва беэҳтиётии ронанда будааст. Танҳо се нафар аз мусофирони автобус зинда мондаанд, ки ҷароҳатҳои вазнин бардоштаанд. Ҳамчунин ду нафар аз мусофирони мошини боркаш ва ду мотосиклрон низ дар байни қурбониён ҳастанд.
Ин садама дар замоне рух дод, ки Афғонистон бо мавҷи бозгашти маҷбурии муҳоҷирон аз Эрон, Тоҷикистон ва Покистон рӯ ба рӯ аст.
Тибқи иттилои Созмони Байналмилалии Муҳоҷират, аз оғози соли ҷорӣ зиёда аз 1,8 миллион афғон аз Эрон ва тақрибан 184 ҳазор нафар аз Покистон инчунин зиёда 1000 нафар аз Тоҷикистон ба Афғонистон бозгардонида шудаанд.
Ба гуфтаи огоҳон, дар роҳҳои Афғонистон садамаҳо зиёд рух медиҳанд, ки сабабҳои асосии ин ҳодисаҳоро роҳҳои фарсуда, набудани қоидаҳои ҳаракат ва беэҳтиётии ронандагон мегӯянд.
