Як муҳоҷири 45-солаи шаҳрванди Тоҷикистон, ки дар Олмон кору зиндагӣ мекард, аз дунё даргузаштааст.
Дар ин бора чанде аз муҳоҷирони тоҷики муқими Олмон хабар доданд. Бар асоси маълумотҳои авалия ӯ рӯзи 29-ми феврал дар шаҳри Нюренберги Олмон фавтидааст ва сабаби марги ӯ ҳанӯз мушахас нест.
Гуфта мешавад, ин нафар Валиҷон Искандаров ном дошта, сокини шаҳри Душанбе будааст, вале маълумоти бештаре дар бораи маҳали зист ва хешовандонаш дар дастрас нест. Ба гуфтаи муҳоҷирони муқими Олмон, ӯ 3-4 моҳ пеш аз Тоҷикистон барои кор ба Олмон омада буд.
Муҳоҷирони тоҷик талош кардаанд аз пулиси шаҳри Нюренберг маълумоти бештаре дар бораи сабаби марги ӯ дарёфт кунанд, вале пулис гуфтааст, танҳо ба хешовандони наздики марҳум ва ё кормандони сафорати Тоҷикистон дар Олмон маълумот хоҳанд дод.
То лаҳзаи таҳияи ин хабар назари сафорати Тоҷикистон дар Олмон дастрас набуд ва маълум нест пайгири сарнавишти фавтидаи Тоҷикистон ҳастнад ё на.
Бархе муҳоҷирони тоҷик худ ташаббусро ба даст гирифта, аз дигар муҳоҷирон хоҳиш доранд то барои шиносоии Валиҷон Искандарови 45-сола ва пайдо намудани пайвандонаш кумак кунанд ва ин хабаро ба дигарон расонанд то ворисони ӯ пайдо шаванд.
