Кумитаи Нобел дар Норвегия рӯзи ҷумъа, 10-уми октябри соли 2025 эълон кард, ки Ҷоизаи сулҳи Нобел дар соли ҷорӣ ба Мария Корина Мачадо, сиёсатмадори мухолифи Венесуэла дода мешавад.
Дар изҳороти расмии Кумита гуфта шудааст, ки Мачадо “дар тӯли солҳои зиёд барои барқарор кардани демократия, ҳуқуқи инсон ва озодии шаҳрвандӣ дар Венесуэла бо вуҷуди таҳдидҳо, зиндону фишорҳои доимии ҳукумат, мубориза бурдааст”.
Мария Корина Мачадо дар суханронии кӯтоҳи худ пас аз эълон гуфт: “Ин ҷоиза на танҳо барои ман, балки барои тамоми мардуми Венесуэла аст, ки бо орзуи озодӣ ва зиндагии шоиста мубориза мебаранд.”
Ҳамзамон бо мавҷи тахминҳо дар расонаҳо, президенти Амрико Доналд Трамп низ умед дошт, ки Кумитаи Нобел ба ӯ ҷоизаро барои “нақши миёнҷигарона” дар бархе аз ихтилофҳои ҷаҳонӣ медиҳад.
Трамп дар мусоҳибаҳои худ гуфта буд, ки “бо қатъ кардани ҷангҳо ва ташвиқи сулҳ дар чанд минтақаи ҷаҳон” сазовори Ҷоизаи Нобел аст. Бо вуҷуди ин, Кумитаи Нобел изҳор дошт, ки тасмимҳо танҳо бар асоси саҳмҳои воқеӣ ва дарозмуддати шахсони номзад гирифта мешаванд, на бар асоси фишор ё таблиғоти сиёсӣ.
Коршиносони байналмилалӣ мегӯянд, ки Кумита бо интихоби Мачадо мехост аҳамияти муборизаҳои осоишта барои демократия ва ҳуқуқи инсонро таъкид кунад, на дипломатияи расмии давлатҳоро.
Ба гуфтаи коршиносон, Ҷоизаи сулҳи Нобел дар соли 2025 ба рамзи пирӯзии мардумони озодихоҳ табдил ёфт. Мария Корина Мачадо бо муборизаи оромона, вале устувори худ ба яке аз чеҳраҳои асосии мубориза барои демократия дар Амрикои Ҷанубӣ табдил ёфт.
