Маркази исломии Тоҷикистон шуруъи моҳи шарифи Рамазонро эълон кард

Шӯрои уламои Маркази исломии Тоҷикистон рӯзи оғози моҳи мубораки Рамазонро расман эълон кард. Бино ба маълумоти ин маркази ягонаи динӣ дар кишвар шуруъи моҳи шариф аз 13 апрел муайян карда шудааст.

Хабаргузории “Азия-Плюс” аз қавли сухангӯи Кумитаи дини Тоҷикистон Афшини Муқим навишта, ки Шӯрои уламо дар ҷаласаи худ, бино ба вазъи эпидемиологӣ вобаста ба намози таровиҳ маҳдудияте ҷорӣ накардааст. Аммо риояи қоидаҳои беҳдоштӣ талаб шудааст.

Ҳамчунин зикр мегардад, ки Шӯро миқдори садақаи фитр ва закотро низ муайян кардааст. Ҳаҷми фитри рӯза барои ҳар шахс 6 сомонӣ ва нисоби закот 25 ҳазор сомонӣ гуфта шудааст. Ба ин тариқ ҳарки соҳиби 25 ҳазор шуда бошад 625 сомонӣ бояд закот бидиҳад.

Ҳамчунин аксари давлатҳои дунё низ рӯзи 13 апрелро аввали моҳи шарифи Рамазон эълон кардаанд. Азҷумла марказҳои исломии кишварҳои Осиёи Марказӣ ҳамин рӯзро барои мусалмонони кишварҳояшон муайян карданд. Дар баробари ин Маркази фатвои Иттиҳоди Аврупо низ чанд рӯзи пеш рӯзи 13 апрелро аввали моҳи Рамазон эълон кард.

Аз фурсати муносиб истифода бурад, мо ҳайати эҷодии “Аздо тв” фарорасии моҳи мубораки Рамазонро барои тамоми мусалмонони дунё, аз ҷумла барои мусалмонони Тоҷикистон муборакбод мегӯем. Ва аз даргои Худованд тоату ибодатҳои холисона ва мағфирати гуноҳонро барои ҳама орзумандем.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.