Вазорати корҳои хориҷии Молдавия лоиҳаи қарореро омода кардааст, ки бо қабул шуданаш созишномаи равуои бидуни раводид барои шаҳрвандони кишварҳои Иттиҳоди Давлатҳои Мустақил бекор мешавад.
Гуфта мешавад, ин созишнома 9-уми октябри соли 1992 дар шаҳри Бишкек имзо шуда буд ва лоиҳаи қарори нав 12-уми ноябри соли ҷорӣ дар ҷаласаи Ҳукумати Молдавия баррасӣ шуда, дар сурати тасдиқ ба порлумони ин кишвар пешниҳод мегардад.
ВКХ-и Молдавия мегӯяд, ки низоми раводид танҳо барои шаҳрвандони Тоҷикистон ва Қирғизистон ҷорӣ карда мешавад, зеро байни ин кишварҳо ва Молдова созишномаҳои дуҷонибаи алоҳида дар бораи равуои бидуни раводиди шаҳрвандон мавҷуд нест.
Аммо барои шаҳрвандони дигар кишварҳои ИДМ, аз ҷумла Русия, низоми кунунӣ боқӣ мемонад, зеро бо онҳо созишномаҳои алоҳида амал мекунанд.
Ба гуфтаи ВКХ, ин иқдом ба самти наздикшавии Молдавия ба Иттиҳоди Аврупо равона шуда, сиёсати муҳоҷирати кишварро бо меъёрҳои аврупоӣ мувофиқ мегардонад.
Мақомоти Молдавия қаблан изҳор доштанд, ки ин кишвар “аз созишномаҳои байналмилалие, ки ба шаҳрвандонаш фоида намеоранд ва ба манфиатҳои миллӣ мувофиқат намекунанд”, хориҷ хоҳад шуд.
Дар сурати қабул шудани қарор, шаҳрвандони Тоҷикистон ва Қирғизистон бояд барои ворид шудан ба ин кишвар бо ҳадафи кор, таҳсил ё сафарҳои шахсӣ раводид гиранд.
Бояд гуфт, ки Молдавия баъди Туркия дувумин кишваре хоҳад шуд, ки дар солҳои охир барои шаҳрвандони Тоҷикистон низоми раводидро ҷорӣ менамояд.
