Додгоҳи минтақаи Ханти-Мансийски Русия муҳлати ҳабси фаъоли тоҷик Ҷунайдулло Худоёровро се моҳи дигар дароз кард.
Бино ба иттилои Радиои Озодӣ, мурофиа рӯзи 18-уми декабр баргузор шуда, додраси додгоҳ ба далелҳои ҷониби Тоҷикистон барои истирдоди Ҷунайдулло Худоёров ба кишвар қонеъ нашудааст ва дар натиҷа ҳабси пешакии ӯ тамдид карда шуд.
Гуфта мешавад, ин мурофиа бо пешниҳоди додситон гузаронида шудааст ва мавзуи асосӣ истирдоди фаъоли мадании тоыик ба Тоҷикистон буд. Назари додситон дар бораи тамдиди ҳабс ва истирдод нашудани Худоёров дастрас нест.
Аммо, вакили мудофеъ Хон-Герей Разов дар суҳбат бо Радиои Озодӣ гуфтааст, ки бо қарори додгоҳ дар бораи дар боздошт мондани зерҳимояаш розӣ нестанд ва шикоят хоҳанд кард.
Дар ҳамин ҳол Фарҳод Худоёров, фаъоли сиёсии тоҷик ва бародари Ҷунайдулло дар суҳбат бо Azda.tv парвандаи бародарашро сохта номида гуфт, ки ба ҳамин хотир додгоҳ дархости ҷониби Тоҷикистонро ба инобат нагирифта, муддати ҳабси Худоёровро барои се моҳи дигар дароз кард.
Дар идома Фарҳод Худоёров афзуд, ки умед дорад мақомоти Тоҷикистон аз даъвои беасосаш даст мекашаду бародарашро аз Русия истирод намекунанд.
Ёдовар мешавем, ки Ҷунайдулло Худоёров моҳи июни соли ҷорӣ бо талаби мақомоти Тоҷикистон дар Русия дастгир шуд ва ҳафт моҳ боз дар Боздоштгоҳ қарор дорад. Мақомоти Тоҷикистон то ҳол дар бораи парвандаи Ҷунайдулло Худоёров чизе нагуфтаанд, аммо тибқи хабарҳо Раёсати корҳои дохилӣ дар Рашт, ӯро ба авбошӣ (моддаи 237, қисми 3-и Кодекси ҷиноӣ) гумонбар медонад.
Худаш моҳи июн дар наворе аз толори додгоҳ гуфт, бар асоси шикояти наздикони оилае боздошт шуд, ки фарзандашон ба куштани бародарзодаи ӯ, Алиризо Худоёров, гунаҳкор аст. Алиризо Худоёров соли 2021 дар як занозанӣ бо зарби корд ба ҳалокат расид. Ҳарчанд дар марги ӯ ду нафарро дастгиру зиндонӣ карданд, аммо баҳсу ҷанҷоли хонаводаҳо поён наёфт.
Фарҳод Худоёров бародари Ҷунайдулло низ дар суҳбат бо Azda.tv зимни ишора ба ин нукта афзуд, ки дар боз шудани парванда нисбати бародараш дар Тоҷикистон додситони ноҳияи Рашт Кишварзода Абдурашид, раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода даст доранд. Алишери Насриддин, яке аз нафароне, ки дар қатли Алиризо даст доштаасту дар озодӣ қарор дорад, аз болои Ҷунайдулло ба мақомот шикоят бурдааст.
Гуфта мешавад, Ҷунайдулло Худоёров соли 2018 бо иттиҳоми пайравӣ аз ҷараёни дар Тоҷикистон мамнуи “Салафия” ба панҷ сол зиндон маҳкум шуда буд ва соли 2019 бар асоси қонуни афв озод гашт. Вай он замон гуфта буд, ки бегуноҳ маҳкум шудааст ва парвандаро супоришӣ дониста буд.
