Мақомоти интизомии Русия рӯзи 20-уми октябр даҳҳо муҳоҷирро пас аз намози ҷумъа дар назди масҷиди шаҳри Котелникии вилояти Маскав боздошт карда, ба комиссариати ҳарбӣ бурданд.
Дар наворҳое, ки дар шабакаҳои иҷтимоӣ нашр шуд, дида мешавад, ки кормандони ОМОН муҳоҷирони зиёдеро боздошт карда, ба автобусҳо савор мекунанд.
Бино ба иттилои расонаҳо, ин муҳоҷиронро ба коммисариатҳои ҳарбӣ бурдаанд ва тамоми аснодашонро гирифта, онҳоро барои ташхиси тиббӣ фиристодаанд.
Гуфта мешавад, ба назди муҳоҷирон вакилони дифоъро роҳ медиҳанд ва онҳоро маҷбур кардаанд, ки бо Вазорати дифои Русия барои иштирок дар ҷанг бо Украина шартнома банданд.
То ҳол маълум нест, ки дар миёни муҳоҷирони боздоштшуда зодагони Тоҷикистон ҳам ҳастанд ё на.
Мақомоти рус дар ҳоле даҳҳо муҳоҷирро боздошт карда, ба комиссариатҳои ҳарбӣ бурдаанд, ки Александр Бастрикин, раиси Кумитаи тафтишотии Русия пешниҳод кардааст, ки дар сурати сарпечӣ аз иштирок дар ҷанги Украина “муҳоҷирон” аз шаҳрвандии Русия маҳрум карда шаванд.
Бастрикин ин пешниҳодро дар як нишасти низомие матраҳ карда, бо ишора ба ҷанги Русияву Украина гуфтааст, ки “ҳоло амалиёти махсуси низомӣ идома дорад ва муҳоҷироне, ки соҳиби шиносномаи русӣ ҳастанд, бояд ба он ҷалб гарданд“.
Инчунин ӯ таъкид кардааст, ки ҳар касе, шаҳрванди Русия аст, вале омода нест, ки қарзи низомии худро адо намояд, бояд дар мавриди бекор кардани шаҳрвандии чунин одам тасмим гирифта шавад.
Пешниҳоди ӯ дар бораи бекор кардани шаҳрвандии хориҷиён дар ҳоле садо медиҳад, ки моҳҳои пеш хабари додани даъватномаи ҳарбӣ ба муҳорон дар шаҳру ноҳияҳои Русия расонаӣ шуда буд.
