Муфтӣ Муҳаммадтақӣ Усмонӣ, яке аз шинохтатарин чеҳраҳои мазҳабӣ дар Покистон ва ҷаҳони ислом аз раҳбарияти Толибон хостааст, ки дари мактабҳоро ба рӯи духтарон боз кунанд.
Муҳаммадтақӣ Усмонӣ, муовини Дорулъулуми Карочии Покистон бо ирсоли номае ба раҳбари Толибон Мулло Ҳибаттуллоҳ Охундзода таҳсили духтаронро як амри шаръӣ ва яке аз заруратҳои замони муосир дониста, аз вай хостааст, ки “ба хотири пешгирӣ аз таблиғоти манфӣ алайҳи Аморати исломӣ дар дунё” тибқи талаботи шаръӣ лозим аст, ки духтарон ба мактабу мадрасаҳо ҷалб карда шаванд.
Вай дар ин номааш бо пешниҳоди ду роҳ гуфтааст, ки метавон осон мушкили набуди ҷои алоҳида барои дарсхонии духтаронро бартараф кард:
а) писарон дар як баст ва духтарон дар басти дигар дар як бино метавонанд алоҳида дарс бихонанд.
б) дар ҳолати дуюм, метавон синфхонаҳои як биноро ду тақсим карда, дар як бахши он писарон ва дар қисми дуюм духтарон дарс бихонанд.
Толибон аз замони дубора сари қудрат омаданашон дар 15-уми августи соли 2021 бо иддаои он, ки замону макони муносибе барои таҳсили духтарон дар Афғонистон вуҷуд надорад, таҳсили духтаронро дар мактабҳо ва донишгоҳҳо манъ кардаанд.
Ба хотири бекор кардани ин қарори Толибон то кунун садҳо нафар аз духтарону бонувони Афғонистон ва сиёсатмадорони дунё дар дохил ва хориҷ аз ин кишвар эътироз кардаанд. Толибон ҳам пайваста гуфтаанд, ҳар вақте шароит фароҳам шуд, духтарон ба мактабу донишгоҳҳо ҷалб карда мешаванд.