Ҳизби халқии ҷумҳурӣ дар Туркия Акрам Имомоғлу, шаҳрдори Истанбулро, ки аз вазифа барканор ва ба зиндон мунтақил шудааст, расман барои интихоботи президентии соли 2028 номзад пешбарӣ кард.
Тавре расонаҳои туркӣ хабар медиҳанд, Ҳизби халқии Туркия, ки қувваи асосии мухолифин ҳукумати Раҷаб Тайиб Эрдуғон маҳсуб мешавад, рӯзи якшанбе интихоботи пешакӣ баргузор кард ва дар он ягона номзади худ собиқ шаҳрдори Истамбул Имомоғлуи 53-соларо ба интихоботи президентии ояндаи ин кишвар эълон кард.
Раиси Ҳизби халқии ҷумҳурӣ Ӯзғур Ӯзил ба расонаҳо гуфта, ки: “Аз 1,7 миллион узви ҳизб 1,6 миллион нафар ба Имомоғлу овоз доданд, то ӯ номзади онҳо дар интихоботи президентии оянда бошад”.
Ӯзил афзуда, ки дар баробари раъйдиҳии расмии аъзои ҳизб инчунин миллионҳо нафар дар саросари кишвар дар қуттиҳои раъйдиҳии рамзӣ, ки бо номи “ҳамраъйӣ” ташкил шуда буданд, ба Имомоғлу овоз доданд.
Ин ҳам дар ҳолест, ки тибқи гузориши расонаҳои туркӣ, Додгоҳи олии ин кишвар рӯзи якшанбе Имомоғлу ва чанд нафари дигарро, ки ба қаллобӣ ва кумак ба гурӯҳҳои террористӣ муттаҳам дониста мешуданд, ба зиндон маҳкум кард.
Вазорати корҳои дохилии Туркия рӯзи якшанбе эълон кард, ки фаъолияти шаҳрдори Истанбул Акрам Имомоғлуро баъди содир шудани ҳукми додгоҳӣ барои зиндонӣ шуданаш, бозмедорад.
Шӯроҳои шаҳрии Истанбул дар баёнияе гуфтааст, ки пас аз боздошти Имомуғлу барои идораи шаҳр ва интихоби раҳбари муваққат рӯзи чоршанбе ҷаласа баргузор мекунад.
Ёдовар мешавем, ки ҳафтаи гузашта мақомоти Туркия шаҳрдори Истанбул Акрам Имомоғлуро, ки аз ҳизби умдаи мухолифони ҳукумати феълии Туркия аст, бо иттиҳомоти ришваву фасод ва ташкилу раҳбарии гурӯҳҳои террористӣ боздошт кард.
Пас аз боздошти ӯ ҳазорҳо ҷонибдораш ба кӯчаҳо баромада даст ба тазоҳуроти хиёбонӣ заданд. Муътаризон ҳукумати Туркияро ба он муттаҳам мекунанд, ки мехоҳад мухолифони сиёсияшро аз саҳна дур созад.
Аммо дар муқобил, ҳукумат иддаои мухолифонро рад карда, мегӯяд, боздошти шаҳрдори Истанбул ва даҳҳо чеҳраи дигар танҳо ба қонуншиканиҳое, ки аз онҳо сар задааст, рабт дорад ва додгоҳ масъаларо файсала мекунад.
