Муҳлати будубоши муҳоҷирон дар Русия 6 моҳи дигар тамдид шуд
Владимир Путин Президенти Русия бо имзои қароре муҳлати будубоши шаҳрвандони хориҷиро дар Русия то моҳи июни соли 2021 дароз намуд.
Қабл аз ин муҳлати будубош ва ба қайдгирии шаҳрвандони хориҷӣ то 15 декабри соли равонро дар бар мегирифт.
Акнун муҳоҷирон ва шаҳрвандони хориҷӣ дар Русия метавонанд, ки то моҳи июни соли 2021 дар қаламрави ин кишвар бе гузаштани дубораи марз худро ба қайд гиранд.
Ин дар ҳолест, ки бо вуҷуди ба имзо расидани чунин қарор бештари муҳоҷирони тоҷик ҳамеша аз он шикоят мекунанд, ки мақомоти Русия амру фармони Президентро сарфи назар мекунанд ва муҳоҷирони тоҷикро бо ҳар баҳонае ихроҷ ё боздошт намуда ва бо гирифтани маблағ озод мекунанд.
Гуфта мешавад, Русия баъд аз интишори коронавирус ва баста гардидани марзҳову баромадани муҳоҷирони меҳнатӣ ба камбудии қувваи корӣ рӯ ба рӯ гардидааст, ки то ба имрӯз идораҳо ва ширкатҳои сохтмонӣ ва дигар корхонаҳо аз набудани қувваи корӣ шикоят мекунанд.
Ҳамзамон чанде пеш Вазорати сохтмони Русия аз ҳукумати ин кишвар хоста буд, ки роҳҳои вуруди муҳоҷиронро сабуктар кунад.
Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.