Акс аз Asiaplustj.info

70 нафар аз шаҳрвандони тоҷик, ки дар марзи Қазоқистону Ӯзбекистон бандмонда буданду ба кишвар оварда шуданд, ба коронавирус мубтало будаанд.

Вуҷуди каронавирус дар тани ин муҳоҷирон баъд аз муоина тасдиқ шуд. Азия-Плюс навиштааст, ки айни ҳол ҳамаи онҳо дар беморхонаи вилоятии Суғд, ки ҳамчун госпитал фаъолият дорад, бистарӣ шуда, зери назорати табибон қарор доранд.

Ба иттилои як манбаъ аз соҳаи тандурустии вилоят, айни замон дар Беморхонаи вилоятии клиникии Суғд 92 нафар беморони коронавирус, аз ҷумла 70 нафари дар боло зикршуда, ки асосан зодагони вилояти Хатлон мебошанд, инчунин 22 нафар сокинони Суғд табобат мегиранд. Дар ҳамин ҳол, ду нафари онҳо, ки сокинони Бӯстон будаанд, дар шуъбаи эҳёгарӣ бистарианд.

Лозим ба ёдоварист, ки 767 нафар шаҳрвандони Тоҷикистон, аз ҷумла беш аз 40 нафар кӯдакон, ки бар асари пандемияи коронавирус дар гузаргоҳи “Жибек Жоли” дар сарҳади Қазоқистону Ӯзбекистон дармонда буданд, рӯзи 3 июл бо транзит тариқи қаламрави Ӯзбекистон бо автобусҳо ба Ватан оварда шуданд.

Созмони байналмиллалии муҳоҷират - Агентии СММ оид ба муҳоҷират, ЮНИСЕФ ва Ҳукумати Тоҷикистон бо талошҳои муштарак ба бозгашти муҳоҷирони тоҷик ба Ватан аз сарҳади байни Қазоқистону Ӯзбекистон муосидат карданд. Бар пояи муқаррароте, ки бо шурӯи коронавирус дар кишварҳои олам ҷорӣ шудааст, афроди бозгашта аз берун ба таври ҳатмӣ аз муониа ва ташхиси пизишкон мегузаранд ва дар сурати ошкор шудани алоими коронавирус онҳо фавран бистарӣ хоҳанд шуд. Тоҷикистон низ аз ин муқаррарот истисно буда наметавонад.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.