Эмомалӣ Раҳмон бо Президенти ФИФА ва Президенти АФК дар шаҳри Душанбе мулоқот кард.
Бино ба иттилои расмӣ, имрӯз, 2-уми майи 2023 “Эмомалӣ Раҳмон дар Қасри миллат Президенти Федератсияи байналмилалии ассотсиатсияи футбол (ФИФА) Ҷованни Инфантино ва Президенти Конфедератсияи футболи Осиё (АФК) Салмон бин Иброҳим Ал-Халифаро, ки бо сафари корӣ ба шаҳри Душанбе ташриф оварданд, ба ҳузур пазируфт.”
Тавре Маркази матбуоти Дастгоҳи Президент хабар дод, дар ин мулоқот ҷонибҳо масъалаҳои “такмили минбаъдаи пойгоҳи зерсохтории футбол дар Тоҷикистон, дурнамои рушди футболи кӯдакону наврасон ва бонувон, инчунин бозии футбол дар толор (футзал)”-ро баррасӣ карданд.
Гуфта мешавад, дар Тоҷикистон беш аз 7400 майдону майдончаҳои варзишӣ дар минтақаҳои мухталифи кишвар таъмиру таҷдид ва бунёд гардидаанд. Танҳо дар шаҳри Душанбе тайи панҷ соли охир беш аз 300 адад майдончаҳои варзишӣ сохта, ба истифода дода шудаанд ва айни ҳол дар пойтахти мо беш аз 470 майдону майдончаҳои бозии футбол мавриди баҳрабардорӣ қарор доранд.
