9-уми майи соли ҷорӣ Эмомалӣ Раҳмон, раисҷумҳури Тоҷикистон пас аз иштирок дар ҷашни бахшида ба 79-умин солгарди “Рӯзи Ғалаба” бо ҳамтои русаш Владимир Путин мулоқот кард.
Бино ба иттилои сомонаи Кремлин, Путин дар мулоқот аз раиcҷумҳури Тоҷикистон Эмомалӣ Шарипович ном бурда, аз ӯ барои иштирокаш дар ҷашни “Рӯзи Ғалаба” ва ҳамдардияш пас аз ҳодисаи хунини “Крокуси Сити Ҳолл” изҳори сипос кардааст.
Гуфта мешавад, ҷонибҳо зимни мулоқот аз рушди муносибатҳои ду кишвар, аз ҷумла дар бахши иқтисод ва ҳамкории Хадамоти махсуси онҳо барои ҷилавгирӣ аз таҳдидҳои умумӣ (терроризм) ёдовра шуданд.
Ҳамзамон Путин қайд карда, ки Русия шарики асосии тиҷоративу иқтисодии Тоҷикистон боқӣ мемонад ва кишвараш аз ҷиҳати муомилоти мол ҷои якумро ишғол мекунад.
Эмомалӣ Раҳмон дар посух аз Путин барои даъваташ ба Маскав изҳори сипос карда, Русияро шарики стратегӣ ва ҳампаймони Тоҷикистон дониста, таъкид кардааст, ки Душанбе ин мавқеашро тағйир доданӣ нест ва бе овардани ҷузъиёт гуфт, ки “душманон мехоҳанд, бо роҳҳои гуногун моро ҷанҷол андозанду пароканда кунанд”.
Инчунин раисҷумҳури Тоҷикистон мисол зад, ки пойгоҳи калонтарини низомии Русия берун аз қаламраваш маҳз дар Тоҷикистон аст ва ӯ давоми ин солҳо мавқеашро дигар накардааст ва дигар карданӣ нест.
Раҳмонов дар ин мулоқот аз муҳоҷирони кории тоҷик ёдовар шуда, танҳо гуфт, ки “ин мавзуъ барои мо ҳассос ва яке аз масъалаҳои асосӣ аст.”
Раисҷумҳури Тоҷикистон дар хитоб ба Путин гуфт, ки “муносибати манро бо фарҳаг, таърих ва забони Русия ва дар умум дар масъалаи эътимоди шахсиямон медонад. Барои ҳамин мо дар ҷаҳони мутамаддин зиндагӣ кардан мехоҳем. Маскав, Русия ҳамеша маркази тамаддуни дунявӣ дар фазои пасошуравӣ буд ва фикр кунам мемонад.”
Бояд гуфт, ин аввалин сафари Раҳмон ба Русия пас аз ҳодисаи хунини “Крокус Сити Ҳолл”, ки гумонбарони асосии он зодагони Тоҷикистонанд, мебошад.
Ва ин сафар ҳам дар ҳоле сурат мегирад, ки вазъи муҳоҷирони кории тоҷикистонӣ дар ин кишвар рӯз ба рӯз бадтар шуда, фишору тафтиш ва ихроҷи бедалели онҳо афзоиш ёфтааст. Пештар расонаҳо аз банд мондани ҳазорҳо зодаи Тоҷикистон дар фурӯдгоҳҳо ва марзҳои Русия хабарҳо дода буданд.
Муҳоҷирони тоҷикистонӣ дар Русия изҳори умедворӣ мекунанд, ки пас аз ин мулоқот муносибати мақомоти кишвари мизбон бо онҳо беҳтар мешавад, аммо тағйири вазъиятро вақт нишон хоҳад дод.
