Шоми 4-уми июли соли ҷорӣ Дабири кулли Созмони Милали Муттаҳид Антониу Гутерриш дар доираи сафарҳояш ба кишварҳои Осиёи Марказӣ ба Тоҷикистон омад.
Дар фурӯдгоҳи байналмилалии Душанбе Гутерришро Ҳоким Холиқзода, муовини аввали нахуствазир пешвоз гирифтааст. Аммо мулоқоти ӯ бо раиcҷумҳури худкомаи Тоҷикистон Эмомалӣ Раҳмон имрӯз, 5-уми июл сурат гирифт.
Дар сомонаи расмии Президенти Тоҷикистон гуфта мешавад, ки ҷонибҳо дар рафти мулоқот барномаи “Об барои рушди устувор”, тағйирёбии иқлим, роҳҳои пешгирӣ аз таҳдиду хатарҳои глобалӣ, аз ҷумла терроризму экстремизм ва гардиши ғайриқонунии маводи мухаддирро баррасӣ намуда, аз буҳрони Афғонистон гуфтаанд.
Маълум нест, ки дар ин мулоқот вазъи ҳуқуқи башар ва озодии баён дар Тоҷикистон баррасӣ шудааст ё на.
Аммо пеш аз сафари Гутерриш ба Душанбе, Ҷунбиши ислоҳот ва рушд ва Кумитаи наҷоти гаравганҳо ва зиндониёни сиёсии Тоҷикистон бо навиштани нома аз ӯ хоста буданд, ки дар мулоқот бо Эмомалӣ Раҳмон масъалаи зиндониёни сиёсӣ ва фишор болои пайвандони онҳо ва фаъолони дар хориҷбударо ба миён гузорад.
Сафари Дабири кулли СММ ба кишварҳои Осиёи Марказӣ 29-уми июн оғоз шуда буд. Ӯ пеш аз Душанбе ба Узбекистон, Қирғизистон ва Қазоқистон сафар кард ва дар нишасти сарони кишварҳои узви Созмони ҳамкориҳои Шанхай дар Остона низ ширкат кард.
Дабири кулли СММ Антонио Гутерриш бори охир ба Тоҷикистон ва кишварҳои Осиёи Марказӣ соли 2017 сафар карда буд.
Бояд гуфт, сафари Дабири кулли СММ баъд аз 7 сол дар ҳоле ба Тоҷикистон сурат мегирад, ки режими имрӯзаи Тоҷикистон дар ин муддат талабу тавсияҳои СММ-ро дар мавриди озод намудани маҳбусони сиёсӣ Улфатхоним Мамадшоева, Манучеҳр Холиқназаров, Зайд Саидов, Маҳмадрӯзи Искандаров, Мақсуд Иброҳим, Сайидумар Ҳусайнӣ, Маҳмадалӣ Ҳаит ва чандин нафари дигар иҷро накардааст.
