Сафири Эрон дар Тоҷикистон Алиризо Ҳақиқиён рӯзи чоршанбе, 20-уми моҳи декабр бо раиси Додгоҳи олии Тоҷикистон Рустам Мирзозода мулоқот кард.
Тавре маркази матбуоти сафорати Эрон дар Тоҷикистон хабар дод, дар ин мулқот ҷонибҳо дар мавриди таҳкими равобити ду кишвар дар ҳама соҳаҳо ва бахусус дар соҳаи иқтисод ва тиҷорат гуфтугӯ кардаанд.
Гуфта мешавад, сафири Эрон дар ин дидор зимни ишора ба ҳамкориҳои додгоҳӣ байни тарафайн, муҳим будани ҳимояти дастгоҳҳои қазоии ду кишвар аз фаъолиятҳои мутақобили иқтисодӣ, тиҷоратӣ ва сармоягузориро дар тавсеаи ҳамкориҳои дуҷониба таъкид кардааст.
Ёдовра мешавем, ки пас аз ширкати Муҳиддин Кабирӣ дар нишасте дар Теҳрон соли 2016, равобити Тоҷикистону Эрон хеле тунд гашт. Аммо пас аз чанд сол дигарбора ин равобит аз сар гирифта шуд ва ҳоло он таҳким меёбад. Ҷонибҳо дар мулоқотҳои худ, бештар болои ҳамкориҳои иқтисодӣ ва қазоӣ диққат медиҳанд.
Ба гуфтаи бархе таҳлилгарон, аз баски Эрон ҳамчун пуштибони ҲНИТ маҳсуб мешуд ва Тоҷикистон ин ҳизбро дар соли 2015 баст ва террористӣ эълон кард, акнун мақомоти тоҷик талош доранд бо роҳи таҳким бахшидани равобити дипломатӣ шартномаҳои бештаре дар соҳаи қазоӣ дошта бошанд, то Эрон нафароне, ки барои Тоҷикистон номатлубанд дар худ роҳ надиҳад ва ё онҳоро боздошт намуда ба Тоҷикистон истирдод кунад.
