Раисони Кумитаи давлатии амнияти миллии Тоҷикистону Қирғизистон, Саймумин Ятимов ва Қамчибек Тошиев бо ҳам мулоқот карданд.
Ин мулоқот 23-уми ноябри соли ҷорӣ дар шаҳри Бӯстони вилояти Суғд баргузор шуда, ҷонибҳо дар мавриди таъйин ва аломатгузории сарҳади давлатии Тоҷикистон ва Қирғизистон дар минтақаҳои боқимонда гуфта, ба гурӯҳҳои корӣ барои идома додани кор дар ин самт супориш доданд.
Ҷониби Тоҷикистон мисли ҳамеша аз ҷузъиёти дигари ин мулоқот чизе нагуфтааст, аммо дар расонаҳои ҳукуматӣ таъкид мешавад, ки “Мулоқот дар фазои дӯстӣ ва ҳусни ҳамдигарфаҳмӣ баргузор гардид”.
Гуфта мешавад, cозишнома дар бораи баргузории мулоқотҳои мунтазам дар мавриди таъйин ва аломатгузории сарҳади давлатии ҳанӯз соли 2002 ҳосил шуда буд ва то кунун гуфтушунидҳо дар Тоҷикистон ва Қирғизистон бо навбат сурат мегирифтаанд.
Тоҷикистону Қирғизистон бо ҳам беш аз 980 километр марзи муштарак доранд ва баъзе нуқтаҳои баҳсбарангезе, ки солҳои ахир сари онҳо даргириҳои мусаллаҳона ва куштори шаҳрвандони ду кишвар сурат гирифт, то ҳол номуайян боқӣ мондааст.
Пештар раиси Кумитаи давлатии амнияти миллии Тоҷикистон Саимумин Ятимов гуфта буд, ки то ин дам ҷонибҳо ба таъйин ва аломатгузории беш аз 90% хати марзи муштараки ду кишвар, ки дар маҷмуъ 987 км-ро ташкил медиҳад, ба мувофиқа расидаанд. Бино ба иддаои ӯ, нуқтаҳои муайян нашудаи марзи ду кишвар камтар аз 100 километр боқӣ мондааст.
Ин дар ҳолест, ки раисҷумҳури Қирғизистон Содир Ҷабборов дар охири соли 2023 таъкид карда буд, ки таъйин ва аломатгузории сарҳади давлатии то баҳори соли 2024 ба анҷом мерасад.
Ҳамзамон Ҳакан Фидан, вазири корҳори хориҷии Туркия моҳи январи соли 2024 замоне ки аз Бишкек ва Душанбе дидан мекард, гуфта буд, ки мушкилоти марзии Тоҷикистону Қирғизистон, дар моҳи март ҳали худро хоҳад ёфт. Вале дида мешавад, ки то ҳанӯз ин масъала ҳали ниҳоии худро наёфтааст.
