Бино ба иттилои Вазорати мудофеи Тоҷикистон, дар давоми 40 рӯзи мавсими тирамоии даъвати сарбозон ба сафи Қувваҳои мусаллаҳ, нақша 96% иҷро шудааст.
Даъвати тирамоҳии ҷавонон ба артиш аз 1-уми октябри соли ҷорӣ оғоз гардида буд, ки ҷавонони солҳои таваллуди 1998-2007-ро ба хидмати ҳарбӣ фаро мехонд. Ба гуфтаи ин ниҳод, Вилояти Мухтори Кӯҳистони Бадахшон нақшаи пешбинигардидаро дар рӯзи аввали даъват 100% иҷро кард.
Гуфта мешавад, то ин муддат шаҳри Душанбе ва ноҳияҳои вилояти Хатлон нақшаи даъвати ҷавонон ба артишро сад дар сад иҷро намуданд. Танҳо нақша дар вилояти Суғд кам иҷро шуда, ки то кунун 89%-ро ашкил медиҳад.
Ва аммо ноҳияҳои тобеи марказ дар муддати 40 рӯзи даъват нақшаро 95% иҷро кардаанд. Вазорат мегӯяд, бархе шаҳру ноҳияҳои тобеи марказ дар алоҳидагӣ, ба монанди Сангвор, Нуробод, Рашт, Тоҷикобод, Лахш, Роғун Файзобод, Турсунзода ва Ҳисор нақшаро пурра иҷро кардаанд.
Вазорати мудофеи Тоҷикистон дар ҳоле аз пурра иҷро шудани нақшаи даъвати сарбрзон дар вилояти Хатлон мегӯяд, ки чанд рӯз қабл бархе аз сокинони ин вилоят дар тамос ба Azda tv гуфтанд, ки маъмурони комиссариятҳои ҳарбӣ дар чандин деҳа падаронеро, ки писаронашон ба хидмат нарафтаанд, бурда чанд рӯз зиндон карданд ва наздиконашон маблағҳои зиёде дода онҳоро озод кардаанд.
Бо вуҷуди талошҳои Ҳукумат барои пинҳон кардани ҳолатҳои “Облава” боз ҳам дар шабакаҳои иҷтимоӣ видоҳое аз он саҳнаҳо нашр шуд, ки ҷавононро зӯран ба артиш мебаранд. Вазорати мудофеаи кишвар борҳо ҳолатҳои сарбозшикорро ба “боздошти шахси ҷинояткор” ё “шӯхии дӯстон” рабт дода, гуфтанист, ки сарбозшикор ё “Облава” аз байн рафтааст.
