Дар давоми 20 рӯзи даъвати наваскарон ба сафи Қувваҳои мусаллаҳи кишвар Вилояти Мухтори Кӯҳистони Бадахшон аввалин шуда, нақшаи даъватро 100% иҷро кард.
Тавре Вазорати мудофиаи Тоҷикистон хабар медиҳад, ҳамчунин дар ин муддат ноҳияҳои тобеи ҷумҳурӣ, аз ҷумла ноҳияҳои Рашт, Сангвор, Лахш, Нуробод ва Тоҷикобод иҷрои нақшаро пурра ба анҷом расониданд.
Ин ниҳод мегӯяд, дар вилояти Хатлон ноҳияҳои Вахш, Фархор, Хуросон, Муъминобод, Носири Хусрав ва шаҳри Норак нақшаи ба онҳо пешбинишударо комилан иҷро кардаанд. Аммо дар умуми вилоят бошад, нақша 76% иҷро шудааст.
Бар бунёди иттилоияи ин ниҳод, дар муддати 20 рӯзи даъвати сарбозон нақшаи хидмати ҳатмии ҳарбӣ дар вилояти Суғд 47% ва дар шаҳри Душанбе 41% иҷро шудааст, аммо ин омор дар сартосари ҷумҳурӣ 62 дарсад иҷро шудааст.
Вазорати мудофиаи Тоҷикистон ба ин зудӣ иҷро шудани нақшаи даъват дар баъзе шаҳру ноҳияҳоро натиҷаи заҳмату фаҳмондадиҳӣ ва ҳисси масъулиятшиносии кормандони давлатӣ, аз ҷумла маъмурони комиссариятҳои ҳарбӣ аст. Аммо воқеияти ҳол, ки ҷараёни сарбозгириро дар шабакаҳои иҷтимоӣ ба намоиш мегузорад, чизи дигар аст.
Пас аз оғози мавсими даъвати баҳории ҷавонон ба артиш хабарҳои зиёде аз рафти “сарбозшикор” дар шабакаҳои иҷтимоӣ нашр мешавад. Аз ҷумла, тибқи иттилои расонаҳо, 12-уми апрели соли равон як ҷавони 24-сола дар шаҳри Ваҳдат аз ошёнаи панҷум худро ба замин андохта, ҷон бохт, ки шоҳидон сабаби онро гурехтан аз “облава” гуфтаанд.
Дар баробари ин, ба гуфтаи бархе сокинони кишвар, мақомоти Тоҷикистон ҳоло услубҳои нави даъват ба артишро ёд гирифтаанд. Аз ҷумла, мақомот раисони маҳаллаҳо ва имомони масҷидҳоро таҳдид мекунанд, ки сарбозони даъватшударо пайдо намуда, ба дасти маъмурони ҳарбӣ бисупоранд, дар акси ҳол масҷидҳоро мебанданд.
Ҳамчунин дар шабакаҳои иҷтимоӣ корбарон аз он шикоят доранд, ки мақомот хонаҳои ҷавонон рафта, волидайни онҳоро маҷбур мекунанд фарзандашонро ҳарҷо бошад, пайдо кунанд ва агар писарашон пайдо нашавад, таҳдид мекунанд, ки барқи онҳоро хомӯш мекунанд.
